Sulmi masiv rus mbi Kievin / Të paktën 15 të vrarë e 40 të plagosur, Zelensky kërkon me urgjencë raketa “Patriot”
Të paktën 15 persona humbën jetën dhe rreth 40 u plagosën gjatë një vale sulmesh raketore ruse natën e 19-20 gushtit kundër kryeqytetit ukrainas, Kiev, dhe rajonit përreth. Këto të dhëna u bënë të ditura nga autoritetet ukrainase.
Shërbimi Shtetëror i Emergjencave të Ukrainës raportoi se në një “sulm masiv” të datës 20 gusht u goditën ndërtesa banimi dhe depo.
Sulmet ndaj Kievit filluan rreth mesnatës, sipas kohës lokale. Ndërkohë, sirenat e sulmeve ajrore u dëgjuan në të gjithë qytetin, të ndjekura nga goditja e rreth 20 raketave ruse.
Si pasojë e këtyre sulmeve, mijëra ndërtesa mbetën pa energji elektrike, duke zhytur në errësirë pjesë të rajonit të Kievit.
Ministria e Mbrojtjes e Rusisë pretendon se ka shënjestruar një strukturë prodhimi të pjesëve të dronëve dhe një depo municionesh në Kiev, sipas mediave shtetërore. BBC nuk ka mundur t’i konfirmojë në mënyrë të pavarur këto pretendime.
Kryebashkiaku i Kievit, Vitaly Klitschko, njoftoi se spitali i fëmijëve u dëmtua gjatë sulmeve të natës, duke pësuar dëme në dritare, si dhe një shkollë. Një qendër industriale në distriktin Solomyansk, në jugperëndim të Kievit, u godit gjithashtu nga raketat, sipas kryetarit të bashkisë.
Guvernatori rajonal i Kievit, Timur Tkachenko, tha se një burrë u vra dhe një tjetër u plagos në sulmin në distriktin Brovary, në rajonin më të gjerë të Kievit.
Presidenti ukrainas Volodymyr Zelensky përsëriti se vendi i tij mbetet pa raketa mbrojtëse ajrore dhe u bëri thirrje aleatëve perëndimorë për ndihmë.
“Për sa kohë që Ukraina nuk ka mjete të mjaftueshme antibalistike, Rusia nuk do të mendojë seriozisht për paqen”, shkroi Zelensky në Telegram. „Raketa për sistemin e mbrojtjes ajrore ‘Patriot’ nuk janë dorëzuar ende dhe ato nevojiten çdo ditë. Çdo raketë shtesë shpëton jetën e popullit tonë“, shtoi ai.
Në një intervistë për korrespondentin e BBC-së në Kiev, Dan Johnson, pranë një ndërtese të shkatërruar, Klitschko theksoi se Ukraina ka nevojë për “municione dhe sisteme anti-raketore – kemi nevojë për mbështetjen e partnerëve tanë”.
Ndërsa Klitschko foli për BBC-në, ekipet e shpëtimit po kërkonin në rrënoja dhe banorët qëndronin jashtë shtëpive të tyre të shkatërruara. Ndër ta ishte Valeria Bondaruk, e cila u zhvendos në Kiev pasi shtëpia e saj në jug të Ukrainës u bombardua, duke besuar se do të ishte më e sigurt me vajzën e saj në kryeqytet. Tani, për herë të dytë gjatë kësaj lufte, ajo është dëbuar nga banesa e saj.
Një copë qelqi e ngulur në murin e dhomës së saj të gjumit dëshmon sa afër ishte rreziku. Gjatë natës, ajo u fsheh në korridorin e apartamentit, pasi nuk kishte strehë në ndërtesë. Ajo i tha BBC-së se ka frikë për të ardhmen e vajzës së saj 13-vjeçare dhe po mendon të largohet nga Ukraina.