ASHK: Si të përditësoni online kartelën e pasurisë dhe hartën kadastrale
Agjencia Shtetërore e Kadastrës (ASHK) ka njoftuar se kartela e pasurisë dhe harta kadastrale mund të përditësohen në çdo kohë nëpërmjet internetit, duke përdorur një aplikacion të vetëm në platformën e-Albania.
Sipas ASHK-së:
- Kartela e pasurisë përmban detaje rreth pronarit ose bashkëpronarëve, numrin dhe vendndodhjen (vëllimi dhe faqja) e pasurisë, zonën kadastrale, si dhe informacione shtesë mbi pronën.
- Harta kadastrale vizualizon kufijtë e pronës, sipërfaqen dhe pozicionin e saj gjeografik.
Për të bërë aplikimin, qytetarët duhet të vizitojnë platformën e-Albania dhe të zgjedhin shërbimin “Aplikim për lëshim kopje kartele të pasurisë”. Në mënyrë automatike, do të përzgjidhet edhe shërbimi “Aplikim për lëshim kopje të fragmentit të hartës kadastrale”.
Më pas, procesi përfshin përzgjedhjen e pasurisë, plotësimin e formularit elektronik, dërgimin e aplikimit dhe kryerjen e pagesës, e cila mund të bëhet online, nëpërmjet bankës ose postës.
ASHK gjithashtu ka informuar se këto shërbime mund të kërkohen edhe me procedurë të përshpejtuar, duke zgjedhur shërbimin me kodin “PP” përpara emërtimit të tij.