Presidenti iranian: Marrëveshja me SHBA, mënyra më e mirë për t’i dhënë fund tensioneve
Presidenti iranian Masoud Pezeshkian ka mbrojtur memorandumin e mirëkuptimit me Shtetet e Bashkuara të Amerikës, duke e cilësuar atë si rrugën më të mirë për t’i dhënë fund situatës së tensionuar mes dy vendeve.
Në një fjalim të publikuar nga agjencia shtetërore iraniane IRNA, Pezeshkian tha se Irani duhet të dalë nga gjendja aktuale e “as luftë, as paqe”.
Sipas presidentit iranian, anëtarët e Këshillit të Lartë të Sigurisë Kombëtare e konsiderojnë memorandumin si marrëveshjen më të mirë të mundshme, duke marrë në konsideratë dinjitetin, mençurinë dhe interesin kombëtar të Iranit.
Pezeshkian theksoi se dokumenti nuk përmban asnjë element që mund të interpretohet si kapitullim përballë Shteteve të Bashkuara.
Memorandumi u nënshkrua nga presidenti amerikan Donald Trump në qershor dhe parashikonte një afat prej 60 ditësh për përfundimin e konfliktit me Iranin dhe arritjen e një marrëveshjeje për programin bërthamor të Teheranit. Afati përfundoi javën e kaluar, por Uashingtoni dhe Teherani ende nuk kanë arritur një kompromis për çështjet kryesore që lidhen me marrëveshjen dhe programin bërthamor iranian.