VIDEO/ Sherr masiv në një dasmë në Ohio, panik mes të ftuarve që ikin të tmerruar nga salla
Një përleshje e dhunshme shpërtheu gjatë një pritjeje dasme në Westlake, Ohio, duke shkaktuar panik mes të ftuarve. Përplasja nisi pas një konflikti familjar dhe shumë prej dasmorëve u detyruan të largoheshin me vrap drejt parkingut.
Sipas raportit të policisë, një prej të ftuarve deklaroi se ishte duke kërcyer kur u sulmua nga katër vëllezër. Situata u përshkallëzua me shpejtësi dhe festa u kthye në një skenë kaotike.
Policia e Westlake tha se 46-vjeçari Raed Mahmoud Suleiman dyshohet se mori një thikë gjalpi nga tavolina dhe nisi të kërcënonte personat e tjerë të pranishëm. Pamjet e incidentit tregojnë momentet e tensionuara brenda sallës, ku një prej të pranishmëve shihet duke hedhur një karrige në drejtim të burrit që mbante thikën.
“Ai e çoi një hap më tej dhe nxori një thikë të vërtetë gjalpi, me sa duket nga një shërbim darke, dhe po kërcënonte njerëzit me të,” tha shefi i Policisë së Westlake, Jerry Vogel.
Kur policia mbërriti në vendngjarje, të paktën 40 persona ishin larguar nga salla dhe ndodheshin në parking, duke tentuar të shmangnin përleshjen. Sipas autoriteteve, sherri dyshohet se lidhet me mosmarrëveshje të vjetra mes dy familjeve.
Për shkak të dasmës, persona që zakonisht nuk takohen u gjendën në të njëjtin ambient dhe tensionet e mëparshme shpërthyen sërish. “Kur u takuan, gjithçka doli përsëri në sipërfaqe,” deklaroi Vogel.
Raed Mahmoud Suleiman u arrestua dhe përballet me akuza për sulm, shkaktim paniku dhe manipulim provash. Sipas policisë, ai dyshohet se e hodhi thikën përpara mbërritjes së efektivëve. Në lidhje me incidentin janë arrestuar edhe dy persona të tjerë.
Autoritetet vijojnë hetimet për të përcaktuar dinamikën e plotë të përleshjes dhe rolin e secilit prej personave të përfshirë.