“`html
Besimi te monedha vendase, depozitat në lekë u rritën dy herë më shumë se ato në euro në korrik
Depozitat në monedhën vendase kanë shënuar rritje të fortë gjatë muajit korrik, sipas statistikave të Bankës së Shqipërisë. Kjo rritje është nxitur si nga bizneset, ashtu edhe nga individët. Edhe kursimet në euro janë rritur, por me ritme më të ngadalta, ndonëse përgjithësisht korriku është një periudhë ku monedha e përbashkët fiton terren për shkak të prurjeve nga turizmi.
Shtesa e kursimeve në lekë në korrik, krahasuar me muajin e kaluar, ishte 16 miliardë lekë (rreth 170 milionë euro), ndërsa për të njëjtën periudhë, shtesa në monedhën e përbashkët ishte 87 milionë euro.
Sipas statistikave të publikuara nga Banka Qendrore, në fund të korrikut, stoku i depozitave në lekë arriti një rekord prej 782 miliardë lekësh. Kjo shënon një zgjerim prej 16 miliardë lekësh, ose 2.1%, në krahasim me qershorin. Zgjerimi ka ardhur kryesisht nga depozitat pa afat, si për bizneset, ashtu edhe për individët. Kjo është rritja më e madhe vjetore që nga janari. Për krahasim, në muajin e parë të vitit, kishte një zgjerim të depozitave të bizneseve si rrjedhojë e pagesave për punime të ndryshme që kryhen nga buxheti.
Në krahasim me korrikun e vitit 2025, depozitat në monedhën vendase janë rritur me 116 miliardë lekë, ose gati 1.2 miliardë euro (të konvertuara me kursin mesatar të periudhës).
Forcimi i vazhdueshëm i monedhës vendase duket se ka rritur besimin te leku. Pritshmëritë janë që leku të vazhdojë të forcohet më tej, duke nxitur mbajtjen e kursimeve në këtë monedhë. Monedha vendase është forcuar ndjeshëm ndaj euros, duke u këmbyer aktualisht afër 92 lekëve, nga 140 lekë një dekadë më parë.
Euro rritet më ngadalë
Situata është krejt e ndryshme nga vitet e mëparshme, kur kursimet në euro po rriteshin me shpejtësi. Duket se rënia e euros po bën atë që Banka e Shqipërisë nuk arriti dot: de-euroizimin e vendit.
Në korrik, stoku i depozitave të raportuara në euro ishte 9.3 miliardë euro, me një rritje prej 87 milionë eurosh, ose 0.94%, në raport me qershorin. Rritja erdhi kryesisht nga individët (rreth 45 milionë euro) dhe më pak nga bizneset (rreth 21 milionë euro) për kursimet pa afat.
Në krahasim me një vit më parë, depozitat në euro janë rritur me 1.04 miliardë euro, me ritme më të ngadalta se ato në lekë. Ky është viti i dytë radhazi që depozitat në lekë po rriten më shpejt se ato në euro. Për krahasim, në vitin 2024, depozitat në euro u zgjeruan me 635 milionë euro, ndërsa ato në lekë me 49 miliardë lekë.
Banka e Shqipërisë raporton stokun e depozitave të konvertuara në lekë, që arriti në 1.56 miliardë lekë. Nga ky total, 782 miliardë lekë janë në monedhën vendase dhe 781 miliardë lekë në euro. Vlera e euros, e konvertuar në lekë, është zhvlerësuar për shkak të kursit.
“`