Shpërthimi i vullkanit pezullon fluturimet në aeroportin kryesor të Indonezisë
Shpërthimi i një vullkani ka shkaktuar pezullimin e qindra fluturimeve në aeroportin kryesor ndërkombëtar të Indonezisë, duke lënë të bllokuar dhjetëra mijëra pasagjerë.
Autoritetet njoftuan se 209 fluturime u pezulluan pasi hiri i vullkanit Anak Krakatoa u vërejt në hapësirën ajrore pranë aeroportit ndërkombëtar Soekarno-Hatta në Xhakartë, të dielën në mëngjes.
Vullkani kishte filluar të shpërthente të premten në mbrëmje, duke shkaktuar aktivitet të vazhdueshëm sizmik, burime llave dhe shpërthime të fuqishme që dëgjoheshin në zonat përreth. Autoritetet thanë se dy shpërthime të tjera ndodhën në orët e para të së dielës.
Më shumë se 22 mijë persona janë prekur nga pezullimi i fluturimeve, i cili u shtri deri në orën 13:30 me kohën lokale.
Ministria e Transportit bëri të ditur se pezullimi preku kryesisht fluturimet drejt dhe nga Singapori, por edhe linja të tjera ndërkombëtare, përfshirë ato drejt Dohas, Sidneit dhe Kuala Lumpurit.
Autoritetet kanë konfirmuar se nuk ka paralajmërim për cunami të lidhur me aktivitetin e fundit të vullkanit, i cili ndodhet në ngushticën Sunda, mes ishujve Java dhe Sumatra.
Ministri i Shëndetësisë u ka bërë thirrje banorëve të zonave të prekura të qëndrojnë në ambiente të mbyllura dhe të përdorin maska për t’u mbrojtur nga rreziqet për rrugët e frymëmarrjes, sytë dhe lëkurën.
Indonezia ndodhet në të ashtuquajturën “Unaza e Zjarrit” e Paqësorit, një zonë me aktivitet të lartë vullkanik dhe sizmik.