“`html
Sezoni i ri, përplasje të vjetra. Reforma territoriale, testi i parë në Kuvend
Më 8 shtator, deputetët rikthehen në Kuvend (ora 17:00) pas pushimeve verore. Në axhendë i presin një sërë reformash të pambyllura, të cilat gjatë muajve të kaluar janë shoqëruar me përplasje të forta politike. Bashkëjetesa mes mazhorancës dhe opozitës brenda së njëjtës sallë pritet të mbetet një sfidë edhe në sesionin e ri parlamentar.
Testi i parë do të jetë reforma administrative-territoriale dhe miratimi i hartës së re të bashkive. Socialistët synojnë që zgjedhjet vendore të vitit 2027 të zhvillohen në një territor të ri, me 46 bashki. Plani i mazhorancës është që harta e re të miratohet në fillim të muajit tetor, ndërsa opozita këmbëngul se një reformë e tillë kërkon konsensus politik.
“Kujtojmë këtu, meqë ju referuat vendimmarrjes së Kolegjit Zgjedhor dhe Gjykatës Kushtetuese sa i përket reformës së vitit 2014, që nga ana jonë u çua në Gjykatën Kushtetuese. Objekt i debatit në gjykatë ishte gjithashtu dhe fakti nëse tre të pestat që kërkon miratimi i një reforme të tillë kërkojnë një konsensus substancial midis forcave kryesore politike për miratimin e një reforme të tillë apo pasjen nga një mazhorancë e caktuar të një numri formal votash”, deklaroi deputeti i PD-së, Ivi Kaso për Top Channel.
Opozita nuk i ka votat e nevojshme për të bllokuar në Parlament miratimin e hartës së re territoriale. Në këto kushte, demokratët po shqyrtojnë dy rrugë për ta kundërshtuar atë: betejën në Gjykatën Kushtetuese dhe organizimin e referendumeve lokale në 15 njësi vendore që kundërshtojnë bashkimin me bashki më të mëdha.
“Qëndrimi politik i PD është i qartë, nuk e njeh këtë produkt të njëanshëm që do të sillte fitoren në tavolinë të zgjedhjeve vendore të vitit 2027 dhe do t’i paraprinte rrëmbimit të një tjetër mandati në zgjedhjet e përgjithshme, kurdo që ato të jenë”, u shpreh Kaso.
Pavareësisht përplasjes për reformën territoriale, mazhoranca dhe opozita kanë arritur të gjejnë gjuhën e përbashkët për Kodin e ri Zgjedhor. Bashkëpunimi për reformën zgjedhore pritet të vijojë edhe gjatë sesionit të ri parlamentar.
Hapja e punimeve të Kuvendit është shtyrë për të martën, më 8 shtator, për shkak të ceremonive që lidhen me shenjtërimin e Nënë Terezës. Konferenca e Kryetarëve do të mblidhet paraditen e 8 shtatorit për të miratuar kalendarin e punimeve të Kuvendit. Në axhendë pritet të përfshihen edhe ndryshimet ligjore për rritjen e pagave të magjistratëve.
Në orën 17:00, deputetët do të mblidhen në seancën e parë plenare të sesionit të ri, e cila do të ketë karakter kryesisht ceremonial. Mesazhi kryesor pritet të përcillet nga kryetari i Kuvendit.
Por rikthimi i deputetëve në Parlament pritet të shoqërohet edhe me protesta. Protestuesit kanë paralajmëruar se do të jenë të martën para Kuvendit, në nisje të seancës së parë plenare, duke deklaruar se do t’i presin deputetët me vezë dhe domate.
“`