“`html
Konsumi për shëndetësinë, vetëm 40% e BE-së; gjysmën e faturës e paguajnë familjet, rekord në Europë
Shqipëria vijon të mbetet shumë larg Bashkimit Europian për sa i përket burimeve të alokuara për shëndetësinë. Diferenca është e konsiderueshme, jo vetëm në vlerë monetare, por mbetet e thellë edhe pasi eliminohet efekti i çmimeve më të ulëta në vend.
Krahas nivelit shumë më të ulët të konsumit real për frymë, sistemi shëndetësor shqiptar karakterizohet edhe nga një barrë financiare shumë më e madhe që bie drejtpërdrejt mbi familjet. Ato detyrohen të financojnë nga xhepi gati gjysmën e shpenzimeve shëndetësore, si pasojë e shpenzimeve të ulëta qeveritare.
Sipas të dhënave të Eurostat për vitin 2025, konsumi individual për shëndetësinë në Shqipëri llogaritet në 662 euro për banor, krahasuar me 3,675 euro mesatarisht në BE. Në vlerë nominale, Shqipëria arrin kështu vetëm 18% të mesatares europiane të shpenzimit për banor. Nivelet më të ulëta në Europë janë në Maqedoninë e Veriut (390 euro).
Në total, sipas Eurostat, konsumi për shëndetësinë në Shqipëri në vitin 2025 ishte 1.56 miliardë euro. Kjo shumë përfaqëson 7.7% të konsumit individual aktual, ndërsa në BE shëndetësia zë 13.4%. Në rajon, kryesimin e mban Serbia me 11.5%, ndërsa niveli më i ulët është në Maqedoninë e Veriut, me 5.8%.
Ky tregues nuk përfshin vetëm pagesat që qytetarët bëjnë drejtpërdrejt nga xhepi. Sipas metodologjisë së Eurostat, “Konsumi aktual individual” llogarit mallrat dhe shërbimet që konsumohen nga individët, pavarësisht nëse financohen nga vetë familjet, nga shteti apo nga institucione të tjera. Për këtë arsye, te shëndetësia përfshihen edhe shërbimet e financuara nga fondet publike.
Diferenca nominale me Europën ndikohet nga çmimet. Niveli i çmimeve të produkteve dhe shërbimeve shëndetësore në Shqipëri në 2025 ishte vetëm 44.6% e mesatares së BE-së. Si rrjedhojë, 662 euro në Shqipëri blejnë më shumë shërbime sesa e njëjta shumë në një vend mesatar të BE-së.
Megjithatë, edhe pas korrigjimit për diferencat e çmimeve, hendeku mbetet i thellë. I shprehur në standardin e fuqisë blerëse, konsumi për shëndetësinë arrin në rreth 1,500 PPS për banor në Shqipëri, kundrejt rreth 3,700 PPS në BE. Pra, volumi real i mallrave dhe shërbimeve shëndetësore të konsumuara për person në Shqipëri është vetëm rreth 40% e mesatares europiane. Si rrjedhojë, diferenca nuk mund të shpjegohet vetëm me faktin se mjekët, analizat, barnat apo shërbimet e tjera kushtojnë më pak në Shqipëri. Edhe kur krahasimi bëhet me çmime të barazuara, shqiptarët kanë në dispozicion një volum dukshëm më të ulët shërbimesh dhe produktesh shëndetësore.
Edhe treguesit e përgjithshëm të financimit të sistemit japin të njëjtën tablo. Sipas Organizatës Botërore të Shëndetësisë, shpenzimet korrente për shëndetësinë në Shqipëri ishin 7.05% e PBB-së në vitin 2023. Në Bashkimin Europian, në të njëjtin vit, ato arritën në 10% të PBB-së.
Shqiptarët paguajnë shumë më tepër nga xhepi
Përveçse shpenzimet për shëndetin në tërësi janë të ulëta, problemi bëhet edhe më i dukshëm kur shihet mënyra si financohet kujdesi shëndetësor. Në Shqipëri, 48.27% e shpenzimeve korrente për shëndetësinë në 2023 u paguan drejtpërdrejt nga familjet, sipas të dhënave nga Banka Botërore. Praktikisht, pothuajse një në çdo dy euro të shpenzuara për shëndetin del drejtpërdrejt nga xhepi i qytetarëve.
Ky është niveli më i lartë në Europë. Në vend të dytë është Maqedonia e Veriut (39.6%) e ndjekur nga Bullgaria (35.5%). Në rajon, pagesat më të ulëta nga xhepi janë në Malin e Zi (26.3%). Në BE, pagesat direkte të familjeve përbënin vetëm 14.9% të shpenzimeve shëndetësore.
Dallimi lidhet me rolin shumë më të madh që ka financimi kolektiv në vendet e BE-së. Në vitin 2023, 52.3% e shpenzimeve shëndetësore në BE financoheshin nga skemat e detyrueshme të sigurimit dhe 28.2% nga skemat qeveritare. Së bashku, këto burime mbulonin 80.6% të faturës së shëndetësisë. Në Shqipëri, burimet publike vendase financonin rreth [vlera mungon] % të shpenzimeve korente për shëndetësinë në 2023.
“`