“Përforcimi ushtarak i Norvegjisë përbën një kërcënim”
Kremlini ka reaguar ashpër ndaj vendosjes së artilerisë në kufi, duke deklaruar se do të ndërmerren masa shtesë sigurie.
Vendosja e sistemeve të reja të artilerisë nga Norvegjia pranë kufirit me Rusinë ka shkaktuar një reagim të menjëhershëm nga Moska zyrtare.
Zëdhënësi i Presidentit rus, Dmitry Peskov, deklaroi se ushtria ruse e konsideron këtë përforcim ushtarak si një kërcënim të drejtpërdrejtë për sigurinë kombëtare, duke paralajmëruar masa përgjigjëse.
Sipas informacionit të bërë publik nga ambasadori rus në Oslo, Nikolay Korchunov, Norvegjia ka dislokuar tashmë një batalion artilerie me katër obusë vetëlëvizës K9, prodhuar në Korenë e Jugut, me një rreze qitjeje deri në 40 kilometra.
Plani ushtarak i Oslos parashikon gjithashtu transferimin e 24 sistemeve të tjera të ngjashme për Brigadën Finnmark deri në fund të vitit 2028. Për më tepër, deri në vitin 2030, forcat norvegjeze pritet të marrin 16 lëshues raketash MLRS K239 Chunmoo, me një rreze veprimi deri në 500 kilometra.
Në përgjigje të këtij riarmatimi në zonat kufitare, Peskov theksoi se veprimet e Oslos po monitorohen nga afër nga strukturat ushtarake të Moskës.
“Sigurisht, një përforcim i tillë ushtarak që synon vendin tonë, Rusinë, nuk mund të mos perceptohet si një kërcënim për sigurinë e Rusisë. Kjo është arsye për të marrë masa shtesë për të siguruar sigurinë tonë. Ministria jonë e Mbrojtjes, si dhe shërbimet e tjera përkatëse, po merren me këtë,” – u shpreh zëdhënësi i Kremlinit gjatë konferencës për shtyp.