“`html
Rama Reagon Përsëri për Pagat e Gjyqtarëve: Askush nuk Mund ta Zëvendësojë Parlamentin dhe as ta Urdhërojë Legjislativin
Publikuar më: 14.09.2026
Kryeministri Edi Rama ka vazhduar replikat me gjyqtarët lidhur me çështjen e pagave, duke theksuar se askush nuk mund ta zëvendësojë Kuvendin dhe as ta urdhërojë atë.
Në një postim të tij, Kryeministri Rama shprehet:
“Kurrë jo, kjo nuk është gjuhë gjykatësi, por gjuhë ultrasi që bërtet në rrugë kundër VAR-it. Keqardhje dhe disa të vërteta të thjeshta: Askush nuk e zëvendëson dot parlamentin dhe as nuk e urdhëron dot legjislativin se kur duhet ta ngrejë dorën. Vetëm Gjykata Kushtetuese, dhe askush tjetër, ka të drejtën dhe detyrën t’i thotë se kur e ka ngritur dorën gabim, por as ajo vetë nuk i thotë dot kurrsesi pushtetit të pavarur legjislativ se si duhet ta ngrejë dorën.
Politikën e pagave e propozon vetëm qeveria, e miraton vetëm parlamenti dhe e zbaton vetëm qeveria. Gjykata Kushtetuese ndërhyn vetëm nëse cënohet një parim a një normë kushtetuese, që ligjvënësit duhet ta riparojnë pa u cënuar në pavarësinë e tyre, siç e shohin ata të udhës të shprehen me votën e tyre.
Nëse, larg qoftë, shoqatat e prokurorëve dhe të gjykatësve kanë vendosur që me mjete politike dhe juridike, të koordinuara me zyrat e prokurorive dhe të gjykatave, si një ushtri e rreshtuar kundër qeverisë, të na imponohen me kallzime, sigurime a përmbarime për të rritur pagat e tyre, atëherë jemi përpara një sfide të një lloji të ri, e cila nuk na tremb, por më shqetëson pamasë për potencialin destruktiv që ka. Po ne nuk duam të jetë kështu dhe unë nuk dua ta lejoj që të devijojë në një konflikt pushtetesh, sepse ndryshe nga si e mendon ky gjykatësi mediatik, kjo e pagave stratosferike, për ne nuk është çështje inati, por sfidë shtetbërjeje europiane të Shqipërisë. Është shumë e thjeshtë.
Tryeza e përgatitur për takimin e kërkuar dhe të anulluar vazhdon të jetë gati. Në 17 shtator mbaron vetëm ky episod i tensionuar publikisht, që mund dhe duhet të ishte shmangur, por nuk shteron nevoja për të komunikuar mes pushteteve të pavarura. Përkundrazi, ajo nuk lindi nga episodi i pagave dhe do të jetë edhe më e madhe në çdo hap deri në anëtarësimin në Bashkimin Europian. Por ne tryezën dhe gatishmërinë kemi, të tjerat janë në gjykimin e gjykatësve 🙂
Shkrimi origjinal i Kryeministrit:
- “Kurrë jo, kjo nuk është gjuhë gjykatësi, po gjuhë ultrasi që bërtet në rrugë kundër VAR-it. Keqardhje dhe disa të vërteta të thjeshta: Askush nuk e zëvendëson dot parlamentin dhe as nuk e urdhëron dot legjislativin se kur duhet ta ngrejë dorën. Vetëm Gjykata Kushtetuese e… — Edi Rama (@ediramaal) “
Historiku i Përplasjes:
Magjistratëve të Shqipërisë, si dhe gjithë punonjësve të administratës, nuk u janë kaluar rrogat e muajit gusht me vendim të qeverisë. Shkak është bërë rritja që gjyqtarët dhe prokurorët vendosën vetë, pasi Kuvendi nuk iu përgjigj në kohë vendimit të Gjykatës Kushtetuese.
Situata ka përshkallëzuar me dërgimin në SPAK nga ana e magjistratëve të Ministrit të Financave, Petrit Malaj, Sekretarit të Përgjithshëm Gentian Keli dhe 14 drejtuesve të Thesarit në rrethe.
Lëvizja e radhës e magjistratëve për zgjidhjen e ngërçit ishte kërkesa për ndihmë “brenda radhëve” duke e çuar çështjen në Gjykatën Administrative. Administrativja doli një ditë më vonë me vendim ku udhëzoi qeverinë dhe Thesarin e Shtetit të kalonin pagat në llogaritë e çdo punonjësi të drejtësisë. Mirëpo, qeveria përsëri ka refuzuar t’i përgjigjet me veprim, duke dhënë si zgjidhje të vetme votimin e ligjit të ri për pagat në Kuvend në seancën e 17 shtatorit.
Kujtojmë se më 17 shkurt të këtij viti, Gjykata Kushtetuese ka pranuar kërkesën e Unionit të Gjyqtarëve të Shqipërisë, që kundërshtonte ligjin për pagat e magjistratëve dhe ka shpallur antikushtetuese disa dispozita të këtij ligji të miratuar në vitin 2023, i cili ndryshonte formulën e përllogaritjes së pagave të gjyqtarëve dhe prokurorëve.
Me ndryshimet ligjore të vitit 2023, paga e gjyqtarëve llogaritej sa 0.36% e pagës së Presidentit të Republikës. Kushtetuesja tha se kjo ishte një ulje e fshehtë dhe antiligjore, ndërsa i la detyrë Parlamentit të ndërhyjë për të rregulluar hapësirën ligjore.
I vetmi veprim që u ndërmor ishte depozitimi në Kuvend i propozimit të një formule të re që e rriste pagën nga 0.36% sa ajo e Presidentit në 0.38%. Në mungesë të ndërhyrjes së Kuvendit, KLGJ dhe KLP vendosën të zbatojnë vendimin e Gjykatës Kushtetuese duke rritur pagën referuese të magjistratëve nga 156 mijë e 800 në 222 mijë e 425 lekë, si dhe duke ruajtur shtesën prej 14 mijë lekësh për nivelin e kualifikimit.
“`