6 milionë euro të ardhura të padeklaruara, hetim në sektorin e transportit rrugor
Drejtoria e Përgjithshme e Tatimeve ka bërë të ditur se bashkëpunimi me Guardia di Finanza ka nxjerrë në pah një skemë evazioni fiskal në sektorin e transportit rrugor, me rreth 6 milionë euro të ardhura të padeklaruara.
Hetimi, i zhvilluar nga Guardia di Finanza e Chieti-t, në bashkëpunim dhe përmes shkëmbimit të informacionit me administratën tatimore shqiptare, ka zbuluar:
- 95 punonjës të padeklaruar.
- Rreth 3.5 milionë euro fatura për operacione fiktive.
- Mbi 1.2 milionë euro kontribute të papaguara.
Drejtoria e Përgjithshme e Tatimeve theksoi se do të vijojë forcimin e bashkëpunimit dhe shkëmbimit të informacionit me administratat tatimore dhe autoritetet partnere ndërkombëtare. Synimi kryesor është parandalimi i skemave të evazionit fiskal dhe mbrojtja e konkurrencës së ndershme.