Associated Press: Arabia Saudite kërkon mbështetje pasi SHBA-të refuzojnë të sulmojnë Huthit
Arabia Saudite i është drejtuar vendeve rajonale dhe atyre globale për ndihmë në mbrojtjen e hapësirës së saj ajrore kundër sulmeve të rebelëve Huthi të Jemenit. Ky veprim vjen pasi Shtetet e Bashkuara të Amerikës, ofruesi kryesor i saj i sigurisë, nuk pranuan të ndërhynin, raportoi Associated Press, duke cituar zyrtarë rajonalë.
Sipas kësaj agjencie, Arabia Saudite po përballet me mungesë të interceptorëve raketash. Konflikti mes një koalicioni të udhëhequr nga Arabia Saudite dhe militantëve Huthi u rigjallërua në mes të korrikut, pas sulmeve ajrore të Riadit në aeroportin e Sanaas, me qëllim parandalimin e uljes së një aeroplani pasagjerësh iranian.
Në javët e fundit, Huthët kanë arritur përparime të konsiderueshme territoriale kundër forcave të mbështetura nga Arabia Saudite dhe kanë intensifikuar sulmet ndaj objektivave strategjike brenda Arabisë Saudite.
Një zyrtar rajonal theksoi për AP se Arabia Saudite është në një “pozitë shumë të vështirë”, pasi duhet të mbrojë bazat ushtarake, objektet qeveritare dhe infrastrukturën e naftës nga dronët dhe raketat e Houthi-t. Një zyrtar i dytë shtoi se Riadi po kërkon të mbledhë aleatët ndërkombëtarë për një përgjigje kolektive ndaj Huthëve, duke theksuar se “vendimi tani është t’i jepet një shans diplomacisë”.
Omani dhe Egjipti po udhëheqin përpjekjet për uljen e tensioneve, sipas AP. Arabia Saudite i ka kërkuar Francës, Britanisë, Pakistanit dhe Egjiptit mbështetje për mbrojtjen ajrore kundër raketave dhe dronëve.
Presidenti i SHBA-së, Donald Trump, tha javën e kaluar se administrata e tij kishte refuzuar një kërkesë saudite për ndërhyrje ushtarake në Jemen, në mënyrë që të mbante të hapura kanalet me rebelët Huthi. Axios raportoi se Princi i Kurorës Saudite, Mohammed bin Salman, kishte telefonuar dy herë Trumpin për të nxitur sulme ajrore amerikane, ndërkohë që forcat Huthi përparonin drejt Ngushticës strategjike Bab el-Mandeb.
Fundjavën e kaluar, Omani priti një takim mes përfaqësuesve të SHBA-së dhe Huthit për të diskutuar tensionet rajonale, sipas AP. Huthët, të cilët kontrollojnë pjesën më të madhe të Jemenit perëndimor përgjatë bregdetit të Detit të Kuq, pretenduan këtë javë se kishin rrëzuar një avion luftarak saudit F-15 dhe publikuan një video që tregonte rrënoja që dukeshin se i përkisnin një avioni të Forcave Ajrore Mbretërore Saudite.
Ndërkohë, tubacioni kryesor i naftës Lindje-Perëndim i Arabisë Saudite u shënjestrua gjithashtu nga dronë javën e kaluar, duke e detyruar Riadin të mbyllë rrugën strategjike. Autoritetet saudite thanë se sulmi kishte origjinën në Irak, ndërsa milicitë irakiane të mbështetura nga Irani mohuan përgjegjësinë. Ky tubacion lejon që eksportet e naftës së papërpunuar saudite të anashkalojnë Ngushticën e Hormuzit dhe të arrijnë në portin e Yanbusë në Detin e Kuq. Tubacioni është bërë veçanërisht i rëndësishëm mes konfrontimit të SHBA-së me Iranin dhe përçarjeve rreth Ngushticës së Hormuzit.
SHBA-të kanë parë stoqet e tyre të interceptorëve raketor të bien gjatë konfliktit me Iranin, duke kufizuar aftësinë e tyre për të furnizuar interceptorë shtesë Arabisë Saudite. Si pjesë e përgjigjes së tyre ndaj sulmeve në Sanaa, Huthët njoftuan kufizime në trafikun e Detit të Kuq që përfshin naftën saudite. Përparimet e tyre të mëvonshme përgjatë bregdetit perëndimor të Jemenit dhe kapja e territorit strategjik pranë Ngushticës Bab el-Mandeb kanë forcuar aftësinë e tyre për të kërcënuar transportin detar përmes këtij pikë kalimi kyç.