Tatimet: 2800 tatimpagues në tregun e pasurive të paluajtshme, sektori mbetet me risk nëndeklarimet
Deri në qershor, rreth 2800 tatimpagues janë regjistruar në tregun e pasurive të paluajtshme. Administrata tatimore ka evidentuar disa risqe, përfshirë përdorimin e lartë të parave në dorë (cash), nëndeklarimin e transaksioneve dhe copëzimin e kompanive.
Këto shifra u bënë publike nga Drejtori i Menaxhimit të Riskut pranë Administratës Tatimore, Imir Kraja, gjatë një konference të NAREA. Konferenca kishte për qëllim prezantimin e gjetjeve të një studimi mbi formalizimin e profesionit të ndërmjetësit të pasurive të paluajtshme.
Sipas të dhënave të prezantuara, sektori vazhdon të paraqesë risk, pjesërisht për shkak të lidhjes së ngushtë me sektorin e ndërtimit. Një nga elementët kryesorë të identifikuar është përdorimi i konsiderueshëm i transaksioneve cash, i cili lidhet gjithashtu me riskun e pastrimit të parave.
Analiza e Tatimeve nxjerr në pah risqe të tjera, si nëndeklarimi i transaksioneve të shitblerjes dhe qirave, si dhe copëzimi i kompanive me qëllim shmangien e detyrimeve të tatim-fitimit.
Nga të dhënat e bëra publike, rezulton se:
- 30% e kompanive të pasurive të paluajtshme janë regjistruar deri në vitin 2020.
- 70% e tyre janë regjistruar pas vitit 2020.
- 36% e kompanive janë regjistruar në dy vitet e fundit.
- 63% e kompanive janë të lokalizuara në Tiranë, Durrës, Vlorë, Lezhë dhe Sarandë.
Të dhënat u prezantuan në kuadër të diskutimeve për formalizimin e tregut dhe profesionit të ndërmjetësit të pasurive të paluajtshme. Ky është një sektor që administrata tatimore e konsideron të ekspozuar ndaj formave të ndryshme të riskut fiskal.