El Niño thyen rekordin historik, ekspertët paralajmërojnë për një fenomen ekstrem: Po hyjmë në territor të panjohur
Një fenomen jashtëzakonisht i fuqishëm El Niño po forcohet në Oqeanin Paqësor, ndërsa matjet e fundit tregojnë se temperaturat në zonën qendrore të tij kanë kaluar rekordin e regjistruar në vitin 2015.
Sipas të dhënave të Administratës Kombëtare Oqeanike dhe Atmosferike të SHBA-së (NOAA), rritja e temperaturës ka arritur në 3.05°C mbi mesataren e periudhës 1991–2020, duke tejkaluar rekordin prej 3.02°C të regjistruar në fund të nëntorit 2015.
Edhe treguesi ONI, i bazuar në temperaturat e sipërfaqes së detit në zonën Nino 3.4 të Paqësorit, ndodhet pranë niveleve rekord të regjistruara gjatë episodit të fuqishëm të El Niños të viteve 2015–2016.
Një studiues meteorologjik, Ben Noll, nëpërmjet një postimi në rrjetet sociale ka theksuar se:
- “Ajo që filloi si një ndryshim i erës në një pjesë të largët të Paqësorit Perëndimor nëntë muaj më parë, është zhvilluar në një El Niño me përmasa rekord. Kjo nxehtësi oqeanike do të transferohet në atmosferë deri në vitin 2027, duke sjellë pasoja të thella për klimën globale dhe ekstremet e motit.”
Sipas një analize të klimatologut Zeke Hausfather, bazuar në mesataren e 14 modeleve të parashikimit, temperaturat mund të arrijnë nivele edhe më të larta gjatë muajve nëntor dhe dhjetor. Këto parashikime janë cilësuar si “të jashtëzakonshme” nga Hausfather, ndërsa disa ekspertë e kanë krahasuar intensitetin e mundshëm të fenomenit me episodet më ekstreme të El Niños të regjistruara në dekadat e fundit.
El Niño konsiderohet i pranishëm kur temperaturat e sipërfaqes së detit në zonën përkatëse të Paqësorit tejkalojnë një prag të caktuar. Vlerat mbi 2°C lidhen zakonisht me episode shumë të fuqishme të fenomenit.
Një El Niño veçanërisht i fortë mund të ndikojë në modelet e motit në shumë pjesë të botës, duke sjellë valë të nxehti, thatësira, zjarre, reshje intensive dhe përmbytje, në varësi të rajonit. Ekspertët paralajmërojnë gjithashtu për pasoja të mundshme në bujqësi, furnizimin me ujë dhe çmimet e ushqimeve.
El Niños të fuqishëm të së kaluarës, përfshirë episodet e viteve 1997–1998 dhe 2015–2016, janë shoqëruar me pasoja të mëdha ekonomike dhe humanitare në vende të ndryshme.
Shkencëtarët po studiojnë gjithashtu ndikimin e ndryshimeve klimatike mbi mënyrën se si zhvillohen këto fenomene, pasi ngrohja globale mund të ndikojë në intensitetin dhe pasojat e episodeve të ardhshme.
Ndërkohë, Sekretari i Përgjithshëm i OKB-së, António Guterres, ka paralajmëruar më herët se bota po përballet me një periudhë të ekstremeve gjithnjë e më të mëdha klimatike.