“`html
Si u nda tregu i sigurimit të detyrueshëm të automjeteve për 8-mujorin 2026
Sigurimi i detyrueshëm i automjeteve (TPL) vazhdon të dominojë tregun e sigurimeve të Jo-Jetës edhe gjatë këtij viti. Të dhënat e publikuara nga Autoriteti i Mbikëqyrjes Financiare (AMF) tregojnë se për tetë muajt e parë të vitit 2026, primet e shkruara bruto arritën në 9.76 miliardë lekë, duke shënuar një rritje prej 5.2% krahasuar me periudhën e njëjtë të vitit të kaluar.
Ritmet e rritjes së tregut të këtij produkti janë më të ngadalta këtë vit në krahasim me vitin 2025. Për tetë muajt e parë të vitit 2025, primet e shkruara bruto të sigurimit TPL kishin regjistruar një rritje vjetore prej 13.6%. Ky ngadalësim i ritmeve të rritjes së tregut TPL ka ardhur pjesërisht për shkak të sistemit bonus-malus. Ky sistem ka sjellë një ulje të lehtë të primit mesatar të sigurimit TPL me 2.1%, krahasuar me tetë muajt e parë të vitit 2025.
Megjithëse ritmet e rritjes janë ngadalësuar, pesha e këtij produkti në tregun e sigurimeve të Jo-Jetës po vijon të rritet. Primet e sigurimit TPL përbënin 58.3% të primeve të shkruara bruto në tregun e Jo-Jetës, duke u rritur nga 56.6% që ishte pesha e tyre një vit më parë. Kjo tregon një varësi në rritje të tregut nga ky produkt kryesor i sigurimit motorik.
Kuadri rregullator dhe mënyra e përcaktimit të primit të sigurimit për produktin TPL kanë pësuar ndryshime thelbësore gjatë dy viteve të fundit. Duke filluar nga viti 2025, ka hyrë në fuqi diferencimi i primit të sigurimit bazuar në disa elementë rreziku. Ndërsa prej fillimit të këtij viti ka nisur aplikimi i elementit bonus-malus, duke sjellë shtrenjtim të primit për drejtuesit që kanë shkaktuar dëme dhe çmime më të lira për ata pa histori dëmesh.
Pavarsisht se këta elementë të rinj kanë sjellë primë sigurimi më të diferencuara për drejtues të ndryshëm mjetesh, shifrat zyrtare të AMF-së tregojnë një stagnacion në ndarjen e tregut. Pjesa e shumicës së kompanive është thuajse e njëjtë krahasuar me periudhën tetëmujore të vitit të kaluar.
Për shembull:
- Sigal Insurance Group zotëron 20.60% të primeve të shkruara bruto, një shifër identike me një vit më parë.
- Eurosig ka arritur në 15.28% të tregut, nga 15.2% një vit më parë. Megjithatë, pjesa prej 0.08% e tregut e fituar nga Eurosig, është humbur nga kompania bijë, Insig, e cila ka zbritur në 8.92%, nga 9% që kishte një vit më parë. Nëse bashkë llogaritet pjesa e tregut e dy kompanive të grupit, ajo është 24.20%, e njëjtë me vitin e kaluar.
- Të dy kompanitë e grupit Vienna Insurance Group kanë gjithashtu pjesë tregu identike me një vit më parë: Sigma me 14.6% dhe Intersig me 10%.
- Edhe Atlantik ka mbajtur pjesë tregu të njëjtë me një vit më parë, duke zotëruar 8.4%.
E vetmja “rishpërndarje” e ndjeshme në tregun TPL për 8-mujorin 2026 është rritja e Albsig në nivelin 13.71%, nga 13.7% një vit më parë. Albsig e ka marrë këtë rritje prej 0.01 pikë përqindjeje tregu nga Ansig, e cila ka zbritur në 8.49%, nga 8.5% që kishte një vit më parë.
Burimi: AMF
“`