“`html
Nga 23 lekë në prodhim deri në 250 lekë për shishe në restorante, kostot që po rrisin çmimin e ujit
Çmimet e ujit të pijshëm të ambalazhuar në bare dhe restorante po tregojnë gjithnjë e më shumë një diferencë të konsiderueshme krahasuar me çmimet e shitjes nga prodhuesit vendas.
Në disa bare, çmimi i ujit të ambalazhuar ka arritur të jetë më i lartë se ai i kafes. Nëse një konsumator paguan 100 lekë për kafe, në disa raste për një shishe ujë 0.5 litra, çmimi mund të variojë nga 100 deri në 150 lekë. Për ujë të paketuar në shishe qelqi, çmimi në bare dhe restorante mund të arrijë deri në 250 lekë.
Prodhuesit vendas të ujit të ambalazhuar kanë deklaruar për “Monitor” se pavarësisht rritjes së kostove për shkak të luhatjeve në çmimet e plastikës dhe naftës, ata nuk kanë ndryshuar çmimet e shitjes në prodhim. Madje, sipas tyre, çmimet e shitjes kanë mbetur të qëndrueshme gjatë 10 viteve të fundit. Prodhuesit pohojnë se e shesin ujin me çmimin 23 lekë për shishe. Diferenca më e madhe e çmimit midis prodhimit dhe shitjes në bare e restorante është për paketimin në shishe qelqi, ku sipas prodhuesve, çmimi prej 10 vitesh është 55 lekë për shishe.
Operatorët e bareve dhe restoranteve argumentojnë se konsumatori nuk paguan vetëm ujin. Çmimi final përfshin kosto të tilla si:
- Pagat e punonjësve
- Qiraja
- Energjia elektrike
- Detyrimet tatimore
- Informaliteti në sektor
Sipas tyre, një ndër kostot që ka ndryshuar ndjeshëm vitet e fundit dhe ka ndikuar në aktivitetin e tyre janë shpenzimet për pagat e punonjësve. Me hyrjen në fuqi të pagës minimale prej 50 mijë lekësh në muaj nga 1 janari 2026, kostot për bizneset pritet të rriten. Gjithashtu, baret dhe restorantet raportojnë se kanë rritur ndjeshëm pagat për stafin e kamerierëve dhe banakierëve, të cilat arrijnë në nivele prej 80 mijë deri në 100 mijë lekë në muaj. Kjo rritje e pagave, sipas tyre, është e lidhur me mungesën e fuqisë punëtore.
Në vitin 2025, sipas të dhënave të Ministrisë së Bujqësisë dhe Zhvillimit Rural, është arritur një rekord në prodhimin e ujit të ambalazhuar. Është prodhuar një sasi prej 345.1 milionë litra, 73% më shumë se në vitin 2024. Kjo sasi përfaqëson më të lartën e prodhuar në një dekadë. Përveç prodhimit, është vënë re edhe një rritje e eksporteve. Për vitin 2025, janë eksportuar 54.8 milionë litra ujë i ambalazhuar, duke shënuar një rritje prej 2% krahasuar me vitin 2024.
Përveç sfidave të rritjes së prodhimit, operatorët e sektorit përballen me amortizimin e kostos së prodhimit, e cila është rritur nga ndryshimet e çmimeve të plastikës, tapave, etiketave, qelqit dhe naftës, duke ndikuar kështu në zinxhirin e shtrenjtimit të shërbimit të transportit.
Më herët, drejtues të operatorëve kryesorë prodhues në vend theksuan se këto kosto në rritje i kanë amortizuar përmes investimeve në teknologji të reja për përdorimin e ambalazhimeve PET të riciklueshme. Megjithatë, industria pritet të përballet me një tjetër rritje të kostove në të ardhmen. Prodhuesit paralajmërojnë se me nisjen e zbatimit të ligjit të ri për mbetjet nga 1 janari 2027, i cili përputhet me legjislacionin e Bashkimit Europian, pritet të rriten ndjeshëm kostot prodhuese për këtë industri.
“`