Një kolonë e Organizatës së Kombeve të Bashkuara (OKB), e cila transportonte ndihma humanitare, u bë shënjestër e një sulmi rus me dronë dhe zjarr artilerie në rajonin Kherson, në jug të Ukrainës. Guvernatori lokal, Oleksandr Prokudin, raportoi se me fat nuk pati viktima dhe akuzoi Rusinë për terrorizëm, duke theksuar se kamionët e bardhë me shenjat dalluese të OKB-së, të ngarkuar me ndihma për qytetarët, ishin objektivi i sulmit.
Një fotografi e postuar nga Prokudin ilustron një kamion të shkatërruar, me logon e Programit Botëror të Ushqimit (WFP) të OKB-së, të rrëzuar në një arë. Sulmi ndodhi në komunitetin e Bilozërkës, pranë lumit Dnipro, i cili ndan vijën e frontit.
OKB e dënoi ashpër ngjarjen, duke deklaruar se sulme të tilla janë plotësisht të papranueshme dhe se anëtarët e misioneve humanitare janë të mbrojtur nga e drejta ndërkombëtare humanitare.
Ministri i Jashtëm i Ukrainës, Andrii Sybiha, gjithashtu dënoi sulmin, duke e cilësuar si një shkelje të së drejtës ndërkombëtare nga ana e Rusisë dhe një tregues të përbuzjes së Moskës për jetën e civilëve dhe detyrimet e saj ndërkombëtare.