Sot mbahen zgjedhjet lokale në Maqedoninë e Veriut
Sot në Maqedoninë e Veriut zhvillohen zgjedhjet lokale, ku qytetarët do të zgjedhin kryetarët e komunave dhe anëtarët e këshillave komunalë në gjithsej 80 komuna dhe në Qytetin e Shkupit.
Sipas Komisionit Shtetëror të Zgjedhjeve, në Listën e Votuesve janë regjistruar 1,832,415 qytetarë, të cilët do të kenë mundësi të votojnë në 3,474 qendra votimi.
Kandidatët për të cilët mund të votojnë qytetarët janë:
- 309 kandidatë për kryetar komune
- 576 lista për këshilltarë komunalë, me gjithsej 10,490 kandidatë në garë.
Në këtë proces zgjedhor marrin pjesë:
- 22 parti politike
- 19 koalicione
- 119 grupe votuesish (kandidatë të pavarur)
Qyteti i Shkupit ka numrin më të madh të kandidatëve për kryetar komune, gjithsej 16.
Votimi fillon në orën 07:00 të mëngjesit dhe përfundon në orën 19:00. Nëse në atë kohë ende ka qytetarë në qendrën e votimit, atyre u lejohet të votojnë. Në rast të ndërprerjeve gjatë ditës, votimi mund të zgjatet deri në tre orë, në varësi të vendimit të autoriteteve zgjedhore.
Votimi është i fshehtë. Identifikimi i votuesve bëhet përmes dokumenteve të vlefshme (letërnjoftim ose pasaportë) dhe me pajisje për identifikim biometrik.
Gjatë procesit të votimit, ndalohet votimi në grup apo në emër të të tjerëve, po ashtu ndalohet mbajtja e armëve në vendvotime.