Skandali me bastet në SHBA: FBI zbulon lidhjen e 5 familjeve mafioze me lojtarët e NBA-së, 30 të arrestuar
Prokurori i SHBA-së për Distriktin Lindor të Nju Jorkut, Joseph Nocella Jr., dha detaje në një konferencë për shtyp lidhur me arrestimet e lojtarëve dhe trajnerëve të NBA-së në kuadër të skemave të paligjshme të lojërave të fatit.
Sipas informacionit të bërë publik për mediat, mësohet se mbi 30 persona janë arrestuar si pjesë e një hetimi gjithëpërfshirës për mashtrime në lojërat e fatit dhe bastet sportive, i cili ka nisur disa vite më parë.
Hetimet kanë nxjerrë në pah aktivitete të dyshuara të paligjshme dhe të manipuluara të lojërave të fatit, ku autorët kanë përdorur teknologji të veçantë, përfshirë lente kontakti, për të lexuar letrat, për të manipuluar përzierjen e tyre dhe për të komunikuar me të tjerë. Zyrtarët thanë se ata i jepnin premtimin viktimave të tyre për të luajtur së bashku me individë të njohur, përfshirë atletë.
Akuzat përfshijnë mashtrim me monedha elektronike dhe kriptovaluta, pastrim parash, zhvatje dhe grabitje të armatosur. Një tjetër skemë ka përfshirë lojtarë që kanë përdorur informacione të brendshme për t’i ndihmuar të tjerët të vendosnin baste në lojërat e tyre.
Në një rast specifik, lojtari i NBA-së, Terry Rozier, dyshohet se ka pretenduar një dëmtim para fillimit të një ndeshjeje, duke dhënë kështu informacion të privilegjuar.
Viktimat kanë humbur rreth 7 milionë dollarë (5.2 milionë paund) në këto skema, ndërsa një person raportohet të ketë humbur mbi 1 milion dollarë.
Zyrtarët thanë se Shoqata Kombëtare e Basketbollit (NBA) po bashkëpunon plotësisht dhe se ndeshjet e basketbollit të kolegjit nuk kanë qenë pjesë e këtij hetimi.
Bastet sportive kanë qenë të ndaluara në pjesën më të madhe të SHBA-së nga viti 1992 deri në vitin 2018, kur Gjykata e Lartë ia kaloi shteteve kompetencën për rregullimin e tyre.
Çështja e zbuluar së fundmi përfshin anëtarë të disa prej familjeve më famëkeqe të krimit në Nju Jork, si Bonanno, Genovese dhe Gambino. Pesë Familjet kryesore – Bonanno, Colombo, Gambino, Genovese dhe Lucchese – kanë dominuar mafian italo-amerikane të qytetit që nga viti 1931. Këto familje janë pjesë e organizatës më të madhe mafioze amerikano-siciliane të njohur si La Cosa Nostra, emër që përkthehet si “kjo gjëja jonë”, dhe anëtarët e saj shpesh bashkëpunojnë ngushtë me homologët e tyre në Siçili.
Gjatë tetë muajve të parë të këtij viti, amerikanët kanë vënë bast rreth 100 miliardë dollarë në sporte përmes kanaleve zyrtare, duke shënuar një rritje prej afërsisht 12% krahasuar me vitin 2023, sipas Shoqatës Amerikane të Lojërave të Fatit.