Trump mburret me një marrëveshje të re armëpushimi
Donald Trump ka bashkë-nënshkruar sot një marrëveshje armëpushimi midis Kamboxhias dhe Tajlandës, menjëherë pas mbërritjes së tij në Malajzi. Ky është vizita e tij e parë gjatë turneut aziatik, ku pritet të takohet edhe me homologun kinez Xi Jinping.
Marrëveshja u nënshkrua në Kuala Lumpur nga kryeministri kamboxhian Hun Manet dhe homologu i tij tajlandez Annutin Charnvirakul, si dhe nga presidenti amerikan. Trump ndodhet për një vizitë njëditore në kryeqytetin malajzian për të marrë pjesë në takimin e Shoqatës së Kombeve të Azisë Juglindore (ASEAN). Pas kësaj, ai do të udhëtojë drejt Japonisë dhe Koresë së Jugut.
Tajlanda dhe Kamboxhia u përfshinë në luftime të dhunshme për pesë ditë në korrik. Këto konflikte rezultuan në vdekjen e dhjetëra personave dhe detyruan më shumë se 300.000 civilë të largoheshin përkohësisht nga shtëpitë e tyre. Ngjarjet e korrikut shënuan armiqësitë më të këqija mes dy vendeve në më shumë se 10 vjet, të shkaktuara nga një mosmarrëveshje e gjatë për delimitimin e kufijve të tyre.
Dy vendet e Azisë Juglindore kishin arritur një marrëveshje armëpushimi në fund të korrikut, të ndërmjetësuar nga Donald Trump. Ndërsa fluturonte drejt Malajzisë, Donald Trump e përshëndeti këtë si një “Marrëveshje të Madhe Paqeje”, të cilën ai tha se ishte “negociuar me krenari” mes dy vendeve.
Megjithatë, marrëveshja e nënshkruar sot paraqitet nga Malajzia, e cila mban presidencën aktuale të ASEAN dhe luajti një rol të rëndësishëm në negociata, si një marrëveshje armëpushimi, dhe jo një marrëveshje paqeje. Ministri i Jashtëm i Malajzisë, Mohammad Hassan, i cili ndoqi nga afër bisedimet, deklaroi dje se marrëveshja e re ka të bëjë me vendosjen e vëzhguesve rajonalë në zonat e kontestuara kufitare.
“Ne dëshirojmë të sigurojmë që të mos ketë më shkelje të armëpushimit. Të dy vendet duhet të tërheqin armët e tyre të rënda nga zonat e përfshira dhe, në një fazë të dytë, të vazhdojnë me çminimin përgjatë kufijve të tyre,” theksoi ai.
Dhjetëra kamboxhianë vazhdojnë të jetojnë në kampe të improvizuara pasi u dëbuan nga fshatrat në kufirin që Tajlanda e konsideron pjesë të territorit të saj. Nga ana tjetër, Tajlanda ka qenë e gatshme të negociojë me Kamboxhian me kushtin që Phnom Penh të tërheqë armët e rënda nga kufiri, të shkatërrojë këto territore, të luftojë në mënyrë më efektive rrjetet e mashtrimit në internet dhe të evakuojë qytetarët e saj nga zonat e pretenduara nga Tajlanda.