Aksident tragjik në Egjipt, 16 të vdekur dhe 28 të plagosur
Të paktën 16 persona kanë humbur jetën dhe 28 të tjerë janë plagosur në një aksident tragjik me autobus në lindje të Egjiptit. Aksidenti ndodhi të mërkurën në mëngjes në rrugën që lidh qytetet turistike Dahab dhe Nuweiba, në provincën e Sinait të Jugut.
Ministria egjiptiane e Shëndetësisë njoftoi se në vendngjarje u dërguan 20 ambulanca për dhënien e ndihmës së parë dhe transportimin e të plagosurve në spital. Shkaku i aksidentit mbetet ende i paqartë.
Zona ku ndodhi përplasja është një nga destinacionet e njohura turistike të Egjiptit dhe tërheq vizitorë nga vende të ndryshme të botës. Aksidentet rrugore me pasoja fatale janë të shpeshta në Egjipt. Autoritetet raportuan rreth 6 mijë viktima nga aksidentet rrugore gjatë vitit 2025.
Shpesh, shkaktarë përmenden drejtimi i pakujdesshëm i automjeteve dhe gjendja e dobët e rrugëve. Vetëm muajin e kaluar, 18 persona humbën jetën dhe 30 të tjerë u plagosën pas përplasjes së dy kamionëve në provincën verilindore të Ismailias.