Aksident i rëndë në Çeki: Përplasen dy trenat, të paktën 40 persona të plagosur
Dy trena udhëtarësh në Çeki u përplasën sot, e enjte më 20 nëntor, duke lënë të paktën pesë persona me lëndime të rënda dhe rreth 40 të tjerë me lëndime më të lehta, sipas zyrtarëve dhe mediave lokale.
Shërbimet e shpëtimit të zjarrfikësve thanë se përplasja ndodhi në një zonë që gjendet rreth 132 km në jug të Pragës. Sipas të njëjtit burim, të gjithë udhëtarët u evakuuan nga të dy trenat.
Një zëdhënës i një spitali në zonë deklaroi për agjencinë e lajmeve CTK se pesë persona trajtohen për lëndime të rënda.
Ministri i Transportit, Martin Kupka, deklaroi në një postim në X se shkaqet e përplasjes janë nën hetim. Megjithatë, sipas informacioneve të para, ekziston mundësia që njëri nga trenat të ketë shkelur një sinjal që e detyronte të ndalonte.