Alqi Bllako lirohet nga burgu, i përfshirë në aferën e inceneratorit të Tiranës
Ish-deputeti i Partisë Socialiste, Alqi Bllako, ka dalë nga qelia e burgut sot. Ai ishte i izoluar që nga data 31 mars 2022.
Bllako u dënua për korrupsion pasiv në lidhje me çështjen e inceneratorit të Tiranës. Ai u akuzua për përfitim të parave, konkretisht 119 mijë euro, të cilat ishin dhënë në formë të 7 milionë lekëve babait të tij.
Gjykata e dënoi me 4 vite burg. Pas reduktimit të dënimit, parashikohej që ai të vuante 2 vite e 8 muaj burg. Megjithatë, Gjykata e Posaçme e Korrupsionit dhe Krimit të Organizuar (GJKKO) vendosi lirimin e tij, pasi Bllako tashmë ka vuajtur më shumë burg se sa masa e dënimit të shqiptuar.
Sipas hetimeve të Prokurorisë së Posaçme kundër Korrupsionit dhe Krimit të Organizuar (SPAK), Alqi Bllako ka përfituar në mënyrë të tërthortë rreth 120 mijë euro nga Klodian Zoto dhe Mirel Mërtiri, pronarët de facto të shoqërisë koncesionare të inceneratorit. Këto përfitime janë lidhur me blerjen e një pajisjeje të përdorur në aktivitetin tregtar të babait të tij, i cili drejtonte një fabrikë birre në Ersekë.
Në dosjen hetimore thuhet gjithashtu se Bllako i ka propozuar Vladimir Bezhanit të vazhdonte punën si këshilltar i jashtëm i ministrit të Mjedisit, Lefter Koka, duke ofruar konsulencë juridike gjatë periudhës së përgatitjes së procedurës për dhënien e koncesionit.
Në kohën kur u kryen procedurat për inceneratorin e Tiranës, Alqi Bllako mbante postin e sekretarit në ministrinë e Mjedisit, e cila drejtohej nga Lefter Koka. Më pas, ai u zgjodh deputet nga radhët e Partisë Socialiste, por kjo nuk e mbrojti nga kërkesa e SPAK për arrestimin dhe dënimin e tij me burg.
Paratë e përfituara nga Bllako shihen si një pjesë e vogël në krahasim me abuzimet e mëdha me inceneratorin, i cili pritet të kushtojë mbi 130 milionë euro.