Antimafia çmonton një organizatë shqiptare të trafikut të drogës në Itali, 28 persona të arrestuar
Që nga orët e para të së martës, më 14 prill, ka qenë në zhvillim Operacioni “Daku”, ku Policia e Shtetit në Itali ka ekzekutuar 28 masa paraprake në provinca të ndryshme. Pjesa më e madhe e personave të ndaluar janë shtetas shqiptarë.
Operacioni, i koordinuar nga Antimafia dhe nga Drejtoria Operacionale e Trentos, ka përfshirë gjithashtu personel nga Seksioni Hetimor i Shërbimit Qendror të Operacioneve në Trieste. Aksioni u fokusua në një rrjet trafikimi droge në provincën e Bolzanos. Organizata merrej me trafikimin dhe shpërndarjen e lëndëve narkotike. Aksioni është ende në vijim dhe pritet të dalin detaje të reja.
Operacioni e ka marrë emrin “Daku” për shkak të nofkës apo pseudonimit që shumë nga të dyshuarit shqiptarë përdornin për t’iu drejtuar njëri-tjetrit.
Masat paraprake kundër njëzet e tetë personave të dyshuar, kryesisht shqiptarë, po ekzekutohen nga hetuesit e Skuadrës Fluturuese të Bolzanos, së bashku me kolegët nga Belluno, Trento, Venecia, Verona dhe Vicenza. Gjithashtu, po marrin pjesë njësitë SISCO të Breshias, Trentos, Triestes dhe Venedikut, të bashkuara në kryeqytetin e Tirolit të Jugut nga Shërbimi Qendror i Operacioneve. Kanë marrë pjesë gjithashtu Njësitë e Parandalimit të Krimit të Milanos dhe njësitë e qenve të Ankonës, Milanos dhe Padovës.
Dhjetë nga personat e dyshuar janë dërguar në burg, tetë janë nën arrest shtëpiak, ndërsa dhjetë të tjerëve u është urdhëruar të qëndrojnë në banesat e tyre, sipas informacioneve nga mediat italiane. Provincat e Barletta-Andria-Trani, Brescia, Monza Brianza, Pordenone dhe Sondrio janë gjithashtu të përfshira në këto zhvillime.