Trafik kokaine në Itali, arrestohen babë e bir shqiptarë dhe një 22-vjeçare
Oficerët e karabinierëve nga Njësia e Operacioneve të Frosinone, Itali, kanë arrestuar tre persona të dyshuar për trafik droge. Të ndaluarit janë një 48-vjeçar shqiptar, djali i tij 20-vjeçar dhe një 22-vjeçare italiane, e dashura e këtij të fundit.
Ata u kapën në flagrancë duke poseduar lëndë narkotike me qëllim shpërndarje. Gjatë një operacioni përgjatë Via Monti Lepini, oficerët e karabinierëve ndaluan një makinë ‘Smart’, drejtuar nga i riu, i cili rezultonte të ishte raportuar më parë për vepra penale të lidhura me drogën. Bashkë me të, në sediljen e pasagjerit, ndodhej edhe e dashura e tij.
Duke vënë re shenja të theksuara nervozizmi tek çifti, oficerët vendosën të kryenin një kontroll të plotë të personave dhe automjetit. Tek gruaja u gjetën 2.435 euro në kartëmonedha me prerje të vogël. Më pas, u zbulua një ndarje e fshehur pranë airbag-ut të pasagjerit. Brenda automjetit, u gjetën 37 pako të vulosura, të cilat përmbanin rreth 54 gramë kokainë.
E gjithë sasia e lëndës narkotike u sekuestrua, bashkë me automjetin dhe një ditar ku shënoheshin emra dhe numra, që dyshohet se lidheshin me aktivitetin e paligjshëm dhe llogaritë e tij.
Oficerët vendosën të kryenin menjëherë një kontroll të mëtejshëm në banesën e djalit, ku ndodhej edhe babai i tij 48-vjeçar, person me precedentë penalë të mëparshëm. Gjatë kontrollit në banesë dhe zonën përreth saj, u gjetën:
- Një pako plastike e paketuar me vakum, që përmbante rreth 54 gramë kokainë.
- 210 gramë kokainë.
- Një bllok prej 100 gramësh hashash të mbështjellë me celofan.
- 1.45 gramë hashash shtesë në gjendje të lirë.
- Një makinë elektrike për numërimin e kartëmonedhave.
- Materiale të ndryshme për paketimin e narkotikëve.
Pas përfundimit të procedurave, dy burrat e arrestuar u dërguan në Burgun e Frosinones, ndërsa 22-vjeçarja u vendos në arrest shtëpiak në banesën e saj, sipas urdhrit të prokurorisë.