“`html
Athina përgënjeshtron Ramën: Asnjë negociatë për kufirin detar me Shqipërinë
Athina është distancuar qartë dhe menjëherë nga deklaratat e kryeministrit shqiptar, Edi Rama, i cili foli për konsultime të avancuara mbi delimitimin e Zonës Ekskluzive Ekonomike me Greqinë. Kjo distancë mohon në thelb narrativën e Ramës rreth një marrëveshjeje të afërt dhe një apelimi në Gjykatën e Hagës.
“Tashmë kemi një marrëveshje me qeverinë greke për të shkuar në Gjykatën Ndërkombëtare. Kështu do të bëhet dhe pastaj i takon gjykatës të vendosë. Ambicia jonë është që të përfundojë brenda këtij viti dhe që vjeshtën e ardhshme, ne të deklarojmë që kemi dakordësi për të gjitha çështjet. Ministri Gerapetritis, që është këtu, e përshëndes dhe e admiroj vërtetë mënyrën e tij të hijshme. Ai është angazhuar me ministrin tim të Jashtëm dhe jemi shumë besimplotë. Nga ana jonë nuk shohim çështje. Pra, për ne nuk ka asnjë problem për këtë çështje,” – ishte deklarata e Ramës gjatë Forumit të Delfit në Athinë.
Megjithatë, gazeta greke “Protothema” citon një burim të lartë diplomatik, i cili nënvizon se, pavarësisht faktit se çështja ka qenë në axhendën e të dy vendeve për një kohë të gjatë, procesi u “ngri” kur marrëveshja e vitit 2009 u dërgua në Gjykatën Kushtetuese të Shqipërisë, ku në thelb u anulua.
Ministria e Jashtme Greke thekson se diskutimi mbi delimitimin vjen nga e kaluara, por çështja u referua në Gjykatën Kushtetuese të Shqipërisë dhe aty u anulua. Për këtë arsye, pala shqiptare është ajo që duhet të vazhdojë me procedurat e nevojshme për të ndryshuar vendimin e Gjykatës Kushtetuese.
Sipas të njëjtit burim, caktimi i kufirit detar dhe delimitimi i Zonës Ekskluzive Ekonomike me Shqipërinë “nuk është më ndër prioritetet e menjëhershme të diplomacisë greke”, veçanërisht pas marrëveshjeve që janë arritur tashmë me vende të tjera në rajon, si Italia, por edhe zgjerimit të ujërave territoriale greke në Detin Jon.
“Strategjia e Athinës përqendrohet në zgjidhjen e përgjithshme të çështjeve dypalëshe, por askush nuk po konfirmon në këtë moment se progresi i raportuar nga pala shqiptare do të ndodhë brenda vitit 2026,” – citon burimin e saj “Protothema”.
Nga pala greke, theksohet se nuk ka asnjë tekst mbi çështjet dypalëshe dhe çështjet e pazgjidhura që duhen zgjidhur midis Greqisë dhe Shqipërisë, siç deklaroi zoti Rama në intervistën e tij në Forumin Delphi.
“`