Banka e Shqipërisë dhe BERZH Bashkojnë Forcat për Financimin e Grave Sipërmarrëse
Banka e Shqipërisë dhe Banka Evropiane për Rindërtim dhe Zhvillim (BERZH) organizuan sot ceremoninë e lançimit të programit “WE Finance Code Albania – Kodi për Financimin e Grave Sipërmarrëse”. Ky event shënon fillimin e një partneriteti kombëtar, që synon të avancojë aksesin në financim për ndërmarrjet mikro, të vogla dhe të mesme (MSME) të drejtuara apo në pronësi të grave.
Ceremonia, e zhvilluar në ambientet e Bankës së Shqipërisë, u hap me fjalët përshëndetëse të Guvernatorit të Bankës së Shqipërisë, Gent Sejko, dhe Francis Malige, Drejtor Menaxhues për Institucionet Financiare në BERZH.
Guvernatori Sejko e vlerësoi këtë iniciativë si një angazhim të rëndësishëm, që ka për qëllim të mbështesë zhvillimin e sipërmarrjes së grave përmes një qasjeje të bazuar në të dhëna, bashkëpunimit institucional dhe veprimeve konkrete.
Ai theksoi se Banka e Shqipërisë ka marrë rolin e koordinatores kombëtare, duke udhëhequr krijimin e një ekosistemi të përbashkët midis institucioneve publike dhe financiare, të cilat angazhohen për një treg financiar më gjithëpërfshirës.
Gjatë fjalës së tij, Guvernatori Sejko nënvizoi angazhimin e Bankës së Shqipërisë për ndërtimin e një sistemi financiar modern, duke u fokusuar në:
- Infrastrukturën financiare bashkëkohore.
- Zgjerimin e aksesit në shërbimet financiare.
- Forcimin e edukimit financiar.
- Përmirësimin e cilësisë dhe përdorimit të të dhënave financiare.
Në përfundim, Guvernatori Sejko falënderoi të gjithë aktorët e përfshirë në këtë iniciativë dhe theksoi se suksesi i saj do të matet nga mundësitë reale që do të krijohen për gratë sipërmarrëse në vend.
Një nga rezultatet konkrete të nismës është krijimi i panelit analitik kombëtar të financimit të ndërmarrjeve të vogla dhe të mesme (MSME). Ky instrument ofron një bazë të re njohurish për tregun, duke mundësuar analizimin e integruar të informacionit mbi kreditë dhe depozitat, së bashku me karakteristikat e bizneseve, si gjinia e pronësisë, madhësia e ndërmarrjes, sektori ekonomik, rajoni dhe forma juridike. Paneli do të jetë i aksesueshëm për publikun në faqen zyrtare të Bankës së Shqipërisë dhe do të shërbejë si një instrument i ri për analizë, transparencë dhe vendimmarrje të bazuar në të dhëna.
Pas ceremonisë u zhvillua një panel diskutimi me pjesëmarrjen e Zëvendësguvernatore të Dytë të Bankës së Shqipërisë, Natasha Ahmetaj, si dhe përfaqësues të sektorit bankar dhe të institucioneve publike. Gjatë diskutimit u theksua se si bashkëpunimi ndërinstitucional dhe përdorimi i të dhënave mund të mbështesin zhvillimin e produkteve financiare më të përshtatshme dhe politikave më efektive për sipërmarrjen e grave.
Lançimi i “WE Finance Code Albania” shënon fillimin e një procesi afatgjatë. Institucionet nënshkruese do të punojnë së bashku për të përmirësuar cilësinë e të dhënave, për të monitoruar progresin dhe për të krijuar kushte më të favorshme për zhvillimin e sipërmarrjes së grave në Shqipëri.
Banka e Shqipërisë do të vijojë të kontribuojë, në përputhje me mandatin e saj, për një sistem financiar modern, të qëndrueshëm, efikas dhe gjithëpërfshirës, duke mbështetur zhvillimin e infrastrukturës financiare, cilësinë e statistikave dhe vendimmarrjen e bazuar në të dhëna.