Avokatët e Erion Veliajt kërkojnë përshpejtimin e shqyrtimit të padisë
Avokatët e kryebashkiakut të Tiranës, Erion Veliaj, i kanë dërguar një kërkesë Gjykatës Kushtetuese për të përshpejtuar shqyrtimin e padisë. Kjo padi synon shfuqizimin e masës së arrestimit në burg, të cilën mbrojtja e cilëson si antikushtetuese dhe dëmtuese për kryeqytetin për shkak të mungesës së Veliajt në detyrë.
Çështja penale ndaj Veliajt dhe të pandehurve të tjerë ndodhet në fazën e seancës paraprake, ku do të vendoset nëse dosja e Prokurorisë së Posaçme kundër Korrupsionit dhe Krimit të Organizuar (SPAK) do të kalojë për gjykim.
Kërkesa drejtuar Gjykatës Kushtetuese për përshpejtim vjen dy javë pasi Erion Veliaj, i cili ndodhet në arrest shtëpie që nga muaji shkurt, kërkoi shfuqizimin e vendimeve të gjykatave të niveleve më të ulëta, të cilat kishin miratuar mbajtjen e tij në paraburgim.
Deri më tani, Gjykata Kushtetuese nuk ka caktuar datën për shqyrtimin e kërkesës. Më herët, kjo gjykatë i kishte dhënë të drejtë Veliajt duke e kthyer në detyrë dhe duke shfuqizuar kështu një vendim të Këshillit të Ministrave.
Gjatë seancës së të premtes, Veliaj kërkoi akses real mbi materialet e dosjes, të cilat SPAK ia ka vënë në dispozicion mbrojtjes vetëm në format USB. Ai theksoi se në burg nuk ka pajisje kompjuterike për të cilat mund të përdoren këto materiale. Veliaj akuzoi drejtësinë për standarde të dyfishta, duke sjellë si shembull rastet e ish-presidentit Ilir Meta dhe të pandehurve të tjerë, të cilëve u janë vënë në dispozicion materialet e dosjeve.
Seanca e radhës paraprake, ku pritet të paraqitet mbrojtja e Veliajt, do të zhvillohet më 5 janar.
SPAK akuzon kryebashkiakun e Tiranës për vepra penale si korrupsioni, pastrimi i produkteve të veprës penale ose veprimtarisë kriminale, mosdeklarimi i pasurisë, shpërdorimi i detyrës dhe futurja e sendeve ndaluara në burg.