Banka e Shqipërisë mban të pandryshuar normën bazë të interesit në 2.5%
Banka e Shqipërisë ka vendosur të mos ndryshojë normën bazë të interesit, duke e lënë atë në nivelin 2.5%. Ky vendim vjen pasi institucioni financiar vlerëson se politika monetare aktuale është e përshtatshme për të siguruar stabilitetin e çmimeve dhe për të mbështetur ekonominë.
Guvernatori Gent Sejko shpjegoi se rritja e inflacionit gjatë tremujorit të dytë të vitit ishte kryesisht e lidhur me shtrenjtimin e naftës në tregjet ndërkombëtare. Inflacioni mesatar për muajt prill-maj arriti në 2.9%, një rritje nga 2.5% në tremujorin e parë. Megjithatë, Banka e Shqipërisë parashikon që kjo rritje të jetë kalimtare.
Sejko theksoi se ekonomia shqiptare vazhdon të shënojë ritme të qëndrueshme rritjeje, të mbështetur nga konsumi, investimet private dhe eksportet. Ai shtoi:
“Këshilli Mbikëqyrës vendosi të mbajë të pandryshuar normën bazë të interesit në nivelin 2.5%, pasi gjykon se qëndrimi aktual i politikës monetare mbetet i përshtatshëm. Inflacioni është rritur gjatë tremujorit të dytë, kryesisht si pasojë e rritjes së çmimeve të naftës në tregjet ndërkombëtare. Ne presim që kjo rritje të jetë kalimtare. Ekonomia shqiptare vijon të rritet me ritme solide dhe pranë potencialit të saj, e mbështetur nga konsumi, investimet private dhe eksportet.”
Gjithashtu, tregu i punës paraqitet pozitiv. Punësimi në sektorin privat jobujqësor u rrit me 2.2%, paga mesatare me 11.5%, ndërsa norma e papunësisë mbeti në 8.4%. Banka e Shqipërisë vë në dukje se kreditimi i sektorit privat vazhdon të zgjerohet me ritme të larta.
Në muajin maj, portofoli i kredisë u rrit me 13.8% në terma vjetorë, duke mbështetur investimet e bizneseve dhe blerjen e banesave nga familjet. Guvernatori Sejko nënvizoi:
“Kushtet financiare mbeten stimuluese. Kreditimi i sektorit privat po rritet me ritme të shpejta, ndërsa sektori bankar paraqitet solid dhe rezistent.”
Banka e Shqipërisë paralajmëron se rritja e çmimeve të naftës dhe tensionet gjeopolitike mbeten burimet kryesore të rrezikut. Ajo thekson se:
“Balanca e rreziqeve mbetet në kahun e sipërm për inflacionin dhe në kahun e poshtëm për rritjen ekonomike, për shkak të pasigurive gjeopolitike dhe luhatjeve të çmimeve të naftës. Banka e Shqipërisë do të monitorojë me kujdes zhvillimet ekonomike dhe mbetet e gatshme të reagojë në kohën, kahun dhe me forcën e duhur për të garantuar stabilitetin e çmimeve.”