Bashkimi Europian ka nisur një sistem të ri sigurie që kërkon regjistrimin e gjurmëve të gishtave të udhëtarëve. Ky sistem, i njohur si Sistemi i Ri i Hyrje-Daljeve (EES), pritet të sjellë vonesa në aeroportet dhe pikat kufitare europiane.
Operatorët do të fillojnë mbledhjen e të dhënave biometrike dhe gjurmëve të gishtave për personat që hyjnë ose dalin nga BE. Sistemi do të prezantohet gradualisht gjatë gjashtë muajve, duke u bërë plotësisht funksional më 10 prill 2026 dhe duke zëvendësuar vulosjen manuale të pasaportave.
Ky ndryshim mund të shkaktojë vonesa, veçanërisht për shtetasit shqiptarë që udhëtojnë drejt BE, pasi mund të kërkohet që të dalin nga automjeti në pikat kufitare tokësore.
Aeroportet, portet dhe terminalet hekurudhore janë detyruar të instalojnë pajisje të reja për këto verifikime. Zyrtarë të BE-së kanë deklaruar se sistemi do të përmirësojë menaxhimin e kufijve, duke ditur saktësisht kush hyn, kur dhe ku.
Megjithëse sistemi është shtyrë disa herë për shkak të shqetësimeve teknike, vendet anëtare të BE-së kanë vendosur për një implementim gradual për t’u mundësuar shteteve, udhëtarëve dhe bizneseve të përshtaten.
Autoritetet britanike kanë paralajmëruar për mundësinë e vonesave të gjata gjatë verës, veçanërisht gjatë periudhës së pushimeve shkollore. Janë siguruar hapësira të mëdha pritjeje në Kent për të shmangur bllokimin e rrugëve.
Sistemi do të zbatohet në 29 vendet e zonës Shengen, duke përfshirë Zvicrën, Islandën, Norvegjinë dhe Lihtenshtajnin. Nuk do të zbatohet për personat me leje qëndrimi ose viza afatgjata të BE-së.
Fillimisht, secili vend do të aplikojë sistemin në pika të kufizuara ose për kategori specifike udhëtarësh. Për shembull, Holanda do ta nisë në portet IJmuiden dhe Eemshaven, ndërsa aeroporti Schiphol i Amsterdamit do të fillojë më 3 nëntor. Gjermania e ka nisur në aeroportin Düsseldorf.
Operatorët presin që regjistrimi i parë i të dhënave biometrike të zgjasë më shumë se kontrollet e mëvonshme, por vlerësojnë se shtyrjet kanë ndihmuar në përmirësimin e teknologjisë. Eurotunnel ka investuar 80 milionë paund për ngritjen e pikave të vetëshërbimit dhe punësimin e stafit shtesë.