Von der Leyen në bisedë telefonike me Zelenskyn: BE rikonfirmon mbështetjen për Ukrainën dhe përshpejtimin e procesit të anëtarësimit
Presidentja e Komisionit Evropian, Ursula von der Leyen, zhvilloi një bisedë telefonike me Presidentin e Ukrainës, Volodymyr Zelensky. Gjatë bisedës, ajo rikonfirmoi mbështetjen e plotë të Bashkimit Evropian për Ukrainën në luftën e vazhdueshme me Rusinë.
Në një postim në rrjetin social X, Von der Leyen theksoi se Evropa vazhdon të qëndrojë pranë Ukrainës përballë asaj që ajo e cilësoi si “luftë agresioni të dhunshme” nga Rusia.
Ajo njoftoi gjithashtu se mbështetja financiare për Ukrainën do të vazhdojë, duke përfshirë një paketë prej 28.3 miliardë eurosh vetëm për këtë vit, e cila synon të mbulojë nevojat ushtarake të vendit.
Gjatë bisedës u diskutua edhe procesi i integrimit të Ukrainës në Bashkimin Evropian. Sipas saj, javët e ardhshme do të jenë vendimtare për të bërë hapa të rëndësishëm përpara në rrugën e anëtarësimit.
Bashkimi Evropian ka theksuar vazhdimisht se mbështetja për Ukrainën mbetet një prioritet strategjik, si në aspektin financiar ashtu edhe në atë politik dhe ushtarak.