BE-ja hap një kapitull të ri në negociatat për anëtarësimin e Ukrainës
Bashkimi Evropian ka hapur një kapitull të ri në negociatat për anëtarësimin e Ukrainës, duke shënuar një hap përpara në rrugën e gjatë të Kievit drejt anëtarësimit në BE.
Përfaqësuesit e BE-së dhe Ukrainës kanë filluar në Bruksel bisedimet për kapitullin që ka të bëjë me marrëdhëniet e jashtme, duke përfshirë politikën tregtare, si dhe politikat e jashtme, të sigurisë dhe të mbrojtjes.
Gjatë konferencës për anëtarësimin, ministri gjerman i Shtetit për Evropën, Gunther Krichbaum, nënvizoi rëndësinë e shfrytëzimit të momentit aktual dhe përparimit të procesit. Ai theksoi se qeveria gjermane mbështet procesin gradual të integrimit, duke përfshirë një formë të ndërmjetme të “anëtarësimit të asociuar”, një propozim i paraqitur në maj nga kancelari gjerman Friedrich Merz. Sipas këtij propozimi, Ukraina mund të merrte statusin e vëzhguesit në institucionet e BE-së, pa qenë ende anëtare e plotë.
Presidenti ukrainas Volodymyr Zelensky, i cili ka kërkuar një rrugë më të shpejtë drejt anëtarësimit, e ka pritur me rezerva këtë propozim. Ai shprehu shqetësimin se Ukraina mund të mbetet në një status të përhershëm pezull, ndërmjet vendit kandidat dhe atij anëtar të BE-së. “Anëtarësimi i Ukrainës në Bashkimin Evropian duhet të jetë i plotë – si një anëtare e barabartë,” shkroi Zelensky në rrjetin social X.
Procesi i anëtarësimit në BE synon të sigurojë që vendet kandidate të përmbushin të gjitha kriteret e nevojshme. Ky proces ndahet në 35 kapituj negociues, nga të cilët 33 janë të organizuar në gjashtë fusha kryesore.
Ukraina nuk pritet të finalizojë negociatat për anëtarësim para dekadës së ardhshme. Bisedimet për grupin e parë negociues nisën në mes të qershorit. Hapja e grupit të dytë konsiderohet një sinjal i rëndësishëm, që reformimet e Ukrainës po japin rezultate, pas një vonese dyvjeçare të shkaktuar nga vetoja e Hungarisë.