Bruce Blakeman shpall fitoren për drejtues të Qarkut Nassau, i mbështetur nga Trump
Drejtuesi i Qarkut Nassau, Bruce Blakeman, shpalli fitoren të martën në garën për një mandat të dytë radhazi, duke mundur rivalin demokrat dhe ligjvënësin e qarkut, Seth Koslow.
Blakeman, 70 vjeç, u shpreh: “Ne do të vazhdojmë punën që kemi nisur për ta bërë qarkun tonë edhe më të begatë, për të sjellë hapjen e vendeve të punës, zhvillimin ekonomik, për të mbajtur taksat të ulëta, për të mbështetur zbatimin e ligjit dhe për ta bërë këtë vendin më të mirë për të jetuar në të gjithë Nju Jorkun sot.”
Ai shtoi gjithashtu: “Ne kemi besim në politikat e Presidentit Trump”, duke theksuar se axhenda e tij do të ndiqte atë të presidentit republikan.
Sipas rezultateve të publikuara nga bordi zgjedhor i qarkut, Blakeman kryesonte me 50.6% të votave kundrejt 43.1% të Koslow, me 76% të votave të numëruara deri vonë të martën në mbrëmje.
Fitorja e republikanit vjen pas një fushate të ashpër, e cila u përqendrua në çështje si siguria publike, taksat e pronës dhe partneriteti i debatueshëm i qarkut me Zyrën e Imigracionit dhe Doganave (ICE).
Bruce Blakeman, aleat i Trump, rizgjidhet si Ekzekutiv i Qarkut Nassau
Bruce Blakeman, i cili u zgjodh për herë të parë në vitin 2021, është një aleat i ngushtë i Presidentit Donald Trump dhe ka ndërtuar profilin e tij politik si kandidat pro-zbatimit të ligjit.
Gjatë mandatit të tij, Blakeman ka kundërshtuar politikat e strehimit të disa bashkive dhe është zotuar të bashkëpunojë ngushtë me autoritetet federale të imigracionit. Ai ka arritur një marrëveshje me Zyrën e Imigracionit dhe Doganave (ICE) për të strehuar të paraburgosurit e agjencisë në ambientet e burgjeve të qarkut.
Në prag të zgjedhjeve, Blakeman mori një mbështetje publike nga Trump, i cili e quajti atë një “Patriot të Amerikës së Para” në një postim në platformën Truth Social.
“Bruce ka qenë me ne që nga fillimi dhe është 100% MAGA,” shkroi Trump. “Ai po punon pa u lodhur me Heronjtë e Zbatimit të Ligjit, ICE-së dhe Patrullës Kufitare për të mbrojtur komunitetet tona, për të siguruar ligjin dhe rendin, për të mbrojtur Amendamentin e Dytë, për të forcuar sigurinë e kufirit, për t’i dhënë fund krimit të migrantëve dhe për të ndaluar komunizmin nga shkatërrimi i qyteteve tona dikur të mëdha.”
Blakeman kishte përmbysur balancën politike në vitin 2021, kur mundi për pak kandidaten demokrate në detyrë, Laura Curran, duke e kthyer pozicionin e ekzekutivit të qarkut në kontroll republikan për herë të parë që nga viti 2017.
Në kuadër të bashkëpunimit me administratën Trump, Blakeman ka vendosur që 10 detektivë të Departamentit të Policisë së Nassau-t të punojnë drejtpërdrejt me ICE-në për arrestimin dhe deportimin e emigrantëve të paligjshëm.
“Jam i bekuar që kam mbështetjen e Presidentit Trump, i cili siguroi kufijtë tonë, po lufton kartelet e drogës që po helmojnë fëmijët tanë dhe po mbron vendet e punës amerikane,” tha Blakeman për The Post pas mbështetjes së marrë nga presidenti.