Kryeministri i Mbretërisë së Bashkuar, Keir Starmer, ka emëruar Dan Jarvis si Sekretar të ri të Mbrojtjes. Ky emërim vjen pas dorëheqjes së papritur të John Healy, i cili u tërhoq nga posti për shkak të shqetësimeve për nivelin e ulët të shpenzimeve qeveritare për mbrojtjen.
Dan Jarvis, 52 vjeç, konsiderohet një nga figurat më me përvojë të Partisë Laburiste në fushën e sigurisë kombëtare dhe mbrojtjes. Para se t’i hynte politikës, ai ka shërbyer si oficer në Regjimentin e Parashutistëve Britanikë. Gjatë karrierës së tij ushtarake, ai mori pjesë në misione në Kosovë, Irak, Afganistan dhe Irlandën e Veriut. Ai është diplomuar në Akademinë Ushtarake Mbretërore Sandhurst dhe ka studiuar Politikë dhe Strategji Ndërkombëtare.
Jarvis u zgjodh për herë të parë deputet në vitin 2011 për zonën elektorale Barnsley në veri të Anglisë. Më vonë, ai shërbeu gjithashtu si Kryetar i Bashkisë së Yorkshire Jugore. Deri në emërimin e tij të ri, ai mbante një rol në qeveri me përgjegjësi për luftën kundër terrorizmit, sigurinë kufitare dhe sigurinë kombëtare.
Emërimi i tij ndodh në një moment të ndjeshëm politik për qeverinë britanike, mes kërkesave në rritje brenda Partisë Laburiste për përcaktimin e një afati për drejtimin e partisë nga Starmer. Paralelisht me dorëheqjen e John Healy, raportohet se është larguar nga detyra edhe Sekretari për Forcat e Armatosura, Al Carnes.
Të dy ish-zyrtarët kishin theksuar se niveli aktual i financimit për mbrojtjen është i pamjaftueshëm për sfidat ndërkombëtare. Kjo situatë vjen në një kohë kur lufta në Ukrainë, tensionet në Lindjen e Mesme dhe paralajmërimet e strukturave ushtarake po rrisin presionin për forcimin e kapaciteteve mbrojtëse të Britanisë.
Nga ana e tij, Keir Starmer ka mbrojtur qasjen e qeverisë, duke theksuar se është parashikuar një rritje e ndjeshme e shpenzimeve të mbrojtjes në vitet e ardhshme.