“`html
Debat në Këshillin Kombëtar të PD-së mes Sali Berishës dhe anëtares Ilirjana Kuçana: Thirrje për luftën kundër “mulizimit” të partisë dhe barazisë në karrierë politike.
Në mbledhjen e Këshillit Kombëtar të Partisë Demokratike (PD) të mbajtur këtë të mërkurë, pas përfundimit të propozimeve për ekipin drejtues nga ana e kreut të PD-së, Sali Berisha, ka lindur një debat verbal mes anëtares së Këshillit Kombëtar, Ilirjana Kuçana, dhe vetë Sali Berishës.
Kuçana kërkoi të kishte fjalën për të paraqitur propozimin e një rezolute kundërshtuese ndaj listës së propozuar nga kryetari i PD-së. Berisha, nga ana e tij, sqaroi se fjala e askujt nuk mohohet, por sipas statutit, ekzistonte një rend dite i përcaktuar nga mbledhja e mëparshme.
Mes tyre pati një dialog dhe debat verbal në prani të të gjithë anëtarëve. Kuçana këmbënguli në të drejtën e saj për të parashtruar kundërshtimet. Berisha iu përgjigj duke theksuar se i kishte kthyer një SMS lidhur me këtë çështje dhe insistoi në ndjekjen e statutit. Ai gjithashtu i bëri thirrje disa herë anëtares të qetësohet.
Pas debatit, ish-kandidatja për deputete e PD dhe anëtarja e Këshillit, Ilirjana Kuçanaj, foli për mediat duke shpjeguar qëndrimin e saj. Ajo akuzoi kryetaren e Këshillit, Julinda Emiri, për shkelje të statutit, pasi nuk lexoi në hyrje të mbledhjes rezolutën që ajo kishte depozituar. Rezoluta synonte afrimin e partisë me protestën dhe luftimin e fenomenit të “mulizimit” brenda saj.
Kuçana tha: “Kam depozituar një rezolutë, të cilën kryetarja e ka detyrim ta lexojë. Rezoluta për ta votuar, nëse e voton apo jo Këshilli, mbetet në dorën e tyre. Kryetarja nuk mund ta fillojë detyrën duke shkelur statutin. Duhet ta lexojë rezolutën dhe ajo ka një votë, siç kam edhe unë; të gjithë janë të barabartë.”
Ajo shtoi se rezoluta përmban pika thelbësore për PD-në dhe protestën. “PD duhet të lexojë sheshin. Njerëz që nuk i pranon sheshi nuk mund të katapultohen në pozicione. Unë kam kërkuar, si një parti politike, të dalim nga Këshilli me një rezolutë në mbështetje të protestës. Kam kërkuar gjithashtu mbështetje sa i përket PD-së.”
Ndër propozimet e saj, Kuçana përmendi krijimin e dy organeve të rëndësishme: një pjese intelektuale, që të jetë ndërlidhëse mes protestës dhe partisë, dhe një forumi studentësh dhe nga diaspora, për t’u afruar me sheshin dhe protestën. “PD, nëse nuk lexon sheshin, nuk mund të jetë parti alternative.”
Pika e tretë e rezolutës së saj, sipas Kuçanës, ishte “Mulizimi klanor i PD-së”. Ajo nënvizoi: “Nuk mundet që në PD, kush do karrierë, duhet të mbështetet nga Muli, duhet të kalojnë nga zyra e Flamur Nokës. Ka ardhur momenti që PD të kthehet në meritokraci. Mulizimi është një fenomen që duhet luftuar. I ftoj të gjithë anëtarët e Këshillit të luftojnë mulizimin dhe kandidatët që janë propozuar prej tij. Duhet të votojmë njerëz që janë të shkëputur nga klanet.”
Kuçana përmendi gjithashtu se kishte depozituar edhe disa kërkesa të tjera jo publike për arsye etike. Ajo theksoi se në momentin që zëri i saj nuk dëgjohet në forum, detyrohet ta bëjë publikisht. “Në momentin që PD nuk do të dëgjojë anëtarët e Këshillit, është një problem i madh. PD duhet të afrohet me protestën,” përfundoi Kuçana.
“`