Altin Dumani, kreu i Prokurorisë së Posaçme kundër Korrupsionit dhe Krimit të Organizuar (SPAK), ka theksuar rëndësinë e bashkëpunimit me Policinë e Shtetit dhe institucionet e tjera të zbatimit të ligjit.
Dumani vlerësoi se bashkëpunimi me Policinë e Shtetit është në nivele të mira, por shtoi se ka ende shumë për të përmirësuar, pasi numri i referimeve dhe kallëzimeve nga agjencitë me të cilat SPAK bashkëpunon mbetet i ulët.
Ai theksoi se SPAK është gjithmonë e hapur për bashkëpunim, por numri i referimeve të marra nga agjencitë vazhdon të jetë modest.
Lidhur me denoncimet, Dumani njoftoi se SPAK pranon çdo ditë denoncime anonime përmes faqes online. Ai sqaroi se denoncuesve nuk u kërkohet dokument identifikimi dhe ata ruajnë plotësisht anonimatin.
“Nuk i kërkojmë domosdoshmërish denoncuesit dokument identifikimi dhe ai ngelet anonim,” u shpreh Dumani, duke shtuar se ekziston mundësia që të jepen informacione rreth personave të përfshirë, por pa qenë të detyruar të zbulojnë identitetin e tyre.
Ai konfirmoi mundësinë e bërjes së denoncimeve anonime përmes faqes online të SPAK-ut, si një alternativë shtesë krahas denoncimeve me shkresë.