“`html
Plani: Dhurimi i ushqimeve do të përjashtohet nga taksat
Produktet ushqimore me afërsi të datës së skadencës në vend aktualisht trajtohen në dy mënyra:
- Lihen të skadojnë dhe nxirren jashtë përdorimit pa paguar taksa.
- Nëse dhurohen, paguhen taksa.
Kjo situatë favorizon më shumë bizneset të lënë ushqimin të skadojë, duke mos nxitur kështu dhurimin dhe si pasojë duke krijuar më shumë mbetje ushqimore. Programi Kombëtar për Parandalimin e Krijimit të Mbetjeve sjell në vëmendje këtë aspekt, duke nënvizuar se një ndërhyrje ligjore për lehtësimin e dhurimit të ushqimit mund të ketë një efekt pozitiv.
“Praktika aktuale tregon se për shkak të TVSH-së, shpesh është më e lirë për bizneset të hedhin ushqimin sesa ta rishpërndajnë atë. Në përputhje me qëllimin e Dokumentit të Komunikimit të Misionit të ri të BE-së, për reduktimin e mbetjeve ushqimore dhe për mbështetjen e objektivit të rishpërndarjes së ushqimit të tepërt për konsum njerëzor, do të aplikohet ndryshimi i ligjit për tatimin mbi vlerën e shtuar, ashtu edhe ligjit për tatimin mbi të ardhurat, me qëllim përjashtimin e dhurimeve të ushqimit nga TVSH-ja dhe tatimi mbi të ardhurat. Dhurimi i ushqimit në pikat sociale është pjesë e objektivave për reduktimin e ushqimit me 30% në nivelin e shitjes me pakicë, të parashikuara deri në vitin 2035,” thuhet në dokument.
I njëjti dokument sjell në vëmendje se vende të ndryshme të Bashkimit Evropian, për të inkurajuar dhurimin e ushqimit, kanë investuar në një sërë aspekets si:
- “Banka e Ushqimit në Shqipëri është pjesë e Federatës Evropiane të Bankave të Ushqimit. Kjo u jep bizneseve mundësinë e bashkëpunimit me Bankën e Ushqimit, duke mundësuar shpërndarjen në sasi të ushqimit tek njerëzit në nevojë. Këto qasje ndihmojnë në devijimin e ushqimit të konsumueshëm nga asgjësimi në landfill dhe të vihet në përdorim. Megjithatë, aktualisht, Shqipëria nuk ka një kuadër ligjor dhe rregullator të posaçëm për nxitjen e dhurimeve të ushqimit,” thuhet në program./MONITOR
“`