Dosja hetimore e vdekjes së 3-vjeçarit Brian Spahiu është zbardhur, duke sjellë në dritë detaje rreth ndërhyrjes dentare që ai i është nënshtruar në klinikën e mjekëve Roland dhe Ina Xhaxho.
Sipas dosjes dhe dëshmive të familjarëve, nuk është bërë asnjë grafi paraprake, por vetëm një konsultë me prindërit. Mjekja stomatologe Ina Xhaxho ka kërkuar një foto të dhëmbëve të të miturit, por në ditën e ndërhyrjes, fëmija është futur menjëherë në procedurë.
Fillimisht është planifikuar ndërhyrje në dy dhëmbë, por pas hyrjes në anestezi, është bërë ndërhyrje në 14 dhëmbë, duke u justifikuar si e nevojshme për të shmangur një tjetër anestezi.
Familjarët pretendojnë se nuk kanë pasur kontakt me mjeken që kryesoi ndërhyrjen, megjithëse ajo është paraqitur më vonë në Urdhrin e Stomatologut duke deklaruar se ajo kishte kryer ndërhyrjen.
Disa orë pas ndërhyrjes, fëmija është dërguar në spital në gjendje të rëndë shëndetësore dhe ka ndërruar jetë.
Hetimet tregojnë se familjarët nuk kanë qenë të informuar plotësisht për procedurat dhe se ka pasur dyshime rreth identitetit të mjekut që kryesoi ndërhyrjen.
Në dosje detajohen gjithashtu takimet, bisedimet me mjekët Roland dhe Ina Xhaxho, konsultimi për anestezinë, pagimin e tarifave për procedurën dhe anestezinë, si dhe komunikimi pas ndërhyrjes.
Gjatë qëndrimit në klinikë, fëmija ka treguar shenja të lodhjes dhe përgjumjes, por infermierët dhe mjekët kanë deklaruar se ishte normale pas anestezisë.
Pas largimit nga klinika, gjendja e fëmijës është përkeqësuar, duke shkaktuar rritje të temperaturës dhe humbje vetëdijes, çka ka çuar në transportimin e tij urgjent në reanimacion.