Alarm në Rumani pasi droni përplaset në një ndërtesë apartamentesh! Presidenti thërret ambasadorin rus për shpjegime
Një dron është rrëzuar mbi një pallat banimi në qytetin Galați të Rumanisë, pranë kufirit me Ukrainën, në orët e para të së premtes. Incidenti shkaktoi një shpërthim dhe zjarr në një apartament të katit të dhjetë.
Sipas autoriteteve, rreth 70 persona u evakuuan ose dolën vetë nga ndërtesa. Dy persona pësuan lëndime të lehta dhe morën ndihmë mjekësore në vendngjarje.
Presidenti rumun, pas incidentit, thirri një mbledhje të Këshillit Suprem të Mbrojtjes Kombëtare për të njëjtën ditë në orën 11:00. Ai e cilësoi ngjarjen si “të paprecedentë” dhe deklaroi se kërkon një përgjigje të koordinuar në nivel kombëtar dhe ndërkombëtar, duke theksuar se përgjegjësia i takon plotësisht Rusisë.
“Deklaroj me qartësi absolute se përgjegjësia e plotë për incidentin i takon Federatës Ruse”, u shpreh ai.
Edhe kryeministri në detyrë, Ilie Bolojan, e quajti ngjarjen një shkelje të re të hapësirës ajrore rumune. Ai theksoi se aftësitë e mbrojtjes ajrore janë të kufizuara nga pajisjet ekzistuese dhe dënoi ashpër incidentin. Kryeministri e lidhi ngjarjen me luftën në Ukrainë, duke thënë se veprimet ushtarake të Rusisë po rrezikojnë sigurinë e vendeve të krahut lindor të NATO-s.
“Kjo situatë është e papranueshme… Kjo luftë vazhdon të ndikojë në sigurinë e Rumanisë dhe NATO-s. Kërkoj që Rusia t’i ndalojë menjëherë këto veprime”, deklaroi ai.
Autoritetet rumune vijojnë hetimet për të përcaktuar saktësisht origjinën e dronit dhe rrethanat e incidentit.