Pas “Qatargate”, emri i Mogherinit shfaqet në një hetim të ri. Ish-nënkryetarja e PE, Eva Kaili: E tronditur! Sundimi i ligjit në rrezik
Eva Kaili, ish-nënkryetarja e Parlamentit Europian dhe një nga figurat kryesore të skandalit të njohur si “Qatargate”, është përfshirë në një hetim të ri. Ky hetim lidhet me dyshime për mashtrim në një tender publik të Shërbimit Europian të Veprimit të Jashtëm, ku ka pasur rol ish-shefja e diplomacisë europiane, Federica Mogherini.
Nga Abu Dhabi, Kaili është shprehur për një gazetë italiane se është “e tronditur”, por jo e befasuar nga ky hetim. Ai po shqyrton nëse tenderi për organizimin e Akademisë Diplomatike të BE-së është manipuluar në favor të Kolegjit të Europës, ku Mogherini aktualisht mban postin e dekanes.
Kaili deklaroi gjithashtu se “Belgjika nuk është një vend i sigurt për politikanët, veçanërisht për ata italianë”.
Në kuadër të hetimeve, Mogherini dhe ish-drejtori i politikës së jashtme të BE-së, Stefano Sannino, janë marrë në pyetje dhe janë lënë të lirë të mërkurën në mëngjes.
Kaili, e cila aktualisht drejton zyrën e politikës së jashtme në Parlamentin Europian, i ka cilësuar këto zhvillime si pjesë të një “operacioni kundër Italisë”. Sipas saj, ky operacion po shkatërron karriera politike para se të provohen faktet dhe po vë në rrezik sundimin e ligjit.
Në deklaratat e saj për Politico, ajo e ka krahasuar rastin e Mogherini-t me trajtimin që i është bërë asaj personalisht në skandalin Qatargate. Kaili argumentoi se ajo që prokurorët e përshkruajnë si “ndikim i paligjshëm i huaj” nuk ishte gjë tjetër veçse diplomaci parlamentare e zakonshme, e mbështetur nga OJQ të financuara privatësisht.
Ajo theksoi se pothuajse tre vite pas shpërthimit të skandalit, ende nuk është ngritur asnjë akuzë zyrtare kundër saj.