Sukth/ Kërkohet evakuim urgjent për 500 persona, jeta e tyre në rrezik nga lumi Erzen
Prefektura e Qarkut Durrës ka lëshuar një thirrje urgjente për evakuimin e banorëve në zonën e Sukthit, për shkak të rrezikut të menjëhershëm nga prurjet e shumta të lumit Erzen.
Sipas njoftimit zyrtar, rreth 500 persona ndodhen në zona të prekura nga vërshimet dhe jeta e tyre është në rrezik të drejtpërdrejtë. Autoritetet u kërkojnë banorëve të bashkëpunojnë me strukturat e emergjencës civile dhe të largohen menjëherë nga zonat e rrezikuara.
Evakuimi po organizohet nën koordinimin e strukturave të Bashkisë, Policisë së Shtetit dhe shërbimeve të emergjencës, të cilat po ofrojnë transport, strehim të përkohshëm dhe asistencë për qytetarët e prekur.
Prefektura u bën thirrje banorëve të tregojnë kujdes maksimal dhe të ndjekin udhëzimet e autoriteteve për të shmangur rreziqe të mundshme nga përmbytjet.