Goditja e Rumanisë nga droni rus, Fico i Sllovakisë bën thirrje për dialog me Putinin
Kryeministri i Sllovakisë, Robert Fico, ka shprehur solidaritetin e vendit të tij me Rumaninë pas incidentit me dronin rus. Ai gjithashtu u ka bërë thirrje atyre që lëshojnë deklarata të forta të tregojnë përmbajtje, pasi një dron rus goditi një bllok apartamentesh në Rumani.
Ditën e djeshme, Fico u mburr se ishte i vetmi lider nga Bashkimi Evropian që kishte kontakt të drejtpërdrejtë si me Volodymyr Zelensky, ashtu edhe me Vladimir Putin. Ai është shprehur kundër luftës në Ukrainë dhe ka kërkuar dialog me Rusinë.
“Ne e shohim konfliktin në Ukrainë si një shkelje flagrante të së drejtës ndërkombëtare. Këtë e kemi thënë vazhdimisht. Në këtë drejtim, është edhe më e rëndësishme të komunikojmë me palën ruse, në të njëjtën mënyrë siç bëjmë me palën ukrainase,” u shpreh Fico.
Më herët këtë javë, ai mori pjesë në përurimin e një varreze të rinovuar, e cila i kushtohet ushtarëve sovjetikë, duke përmbushur kështu një premtim që i kishte bërë Putinit gjatë këtij muaji.
Fico konsiderohet si aleati më i ngushtë i Putinit në Bashkimin Evropian, sidomos pas humbjes së Viktor Orban në zgjedhjet e fundit në Hungari.