“`html
Francezët zbulojnë Pogradecin, çmimet e lira dhe ushqimi tradicional tërheqin turistët.
Gjergji, i cili prej vitesh banon në Pogradec, drejton një biznes të vogël për dhënien me qira të varkave buzë liqenit.
Ai shprehet se këtë vit, klientët kryesorë për qiradhënien e varkave janë shtetas të huaj, kryesuar nga francezët, amerikanët dhe italianët. Në krahasim me vitet e kaluara, numri i turistëve vendas sipas tij është në rënie. Turistët vendas kryesisht vijnë nga Maliqi, Përrenjasi dhe Korça.
Tendenca e rritjes së numrit të turistëve të huaj, veçanërisht nga Franca, pohohet edhe nga drejtues të strukturave të akomodimit, bareve dhe restoranteve. Ky fenomen nuk është i kufizuar vetëm në qytetet juglindore, por për të gjithë vendin.
Sipas të dhënave të platformës analitike AirDNA, e cila monitoron rezervimet në platforma si AirBnB, Booking dhe Expedia, rreth 17.7% të netëqëndrimeve në qiratë afatshkurtra deri në qershor 2026 janë rezervuar nga vizitorët francezë. Kjo pozicionon Francën në vendin e parë për rritjen më të lartë vjetore të turistëve të huaj në Shqipëri.
Arsyet e rritjes së numrit të turistëve francezë në Shqipëri
Ofelia Pamla, një shtetase franceze, e cila po kalonte dy javë pushime në Juglindje të Shqipërisë, shprehet se natyra, siguria, ushqimi tradicional dhe kostot e ulëta janë ndër arsyet që po e bëjnë Shqipërinë një destinacion gjithnjë e më tërheqës.
27-vjeçarja, mësuese për arsimin fillor, tregoi se fillimisht kishte dëgjuar për Shqipërinë nga koleget e saj shqiptare. Ajo pranoi se opinionet e përgjithshme në Francë për Shqipërinë nuk kanë qenë të mira, duke përmendur shqetësime për pasigurinë. Megjithatë, miqësia me një kolege shqiptare, e cila jeton në Francë prej 15 vitesh, e bindi atë të vizitonte vendin.
Ofelia Pamla, e cila ka vizituar Pogradecin, Korçën dhe Përmetin, u shpreh e befasuar nga bukuria e natyrës, ushqimi tradicional dhe siguria në këto qytete. Ajo veçoi gatime si byreku në saç dhe petullat e fshira si shumë të veçanta.
Pamla ka parashikuar të shpenzojë rreth 2000 euro për pushimet e saj në Shqipëri, duke vënë në dukje se ky është i njëjti buxhet që do të shpenzonte edhe në Francë, por atje do të mund të qëndronte për më pak ditë për shkak të çmimeve më të larta.
Sipas të dhënave të AirDNA, deri në qershor 2026, Gjermania mbetet tregu i dytë më i rëndësishëm, me një peshë prej 13.39% të netëqëndrimeve, duke shënuar një rënie të lehtë nga periudha e mëparshme. Pas Gjermanisë renditen Shtetet e Bashkuara, me 12.99% të netëqëndrimeve, duke shënuar një rritje nga 11.7% një vit më parë.
“`