Gjermania vendos oficerë policie të paarmatosur në territoret palestineze
Gjermania ka dërguar disa oficerë policie të paarmatosur në territoret palestineze me qëllim të stabilizimit të situatës dhe forcimit të mëtejshëm të forcave lokale të sigurisë civile, raportuan mediat lokale të mërkurën.
“Një forcë policore funksionale është e domosdoshme për paqen e qëndrueshme në Lindjen e Mesme”, deklaroi Ministri i Brendshëm Alexander Dobrindt për Agjencinë Gjermane të Shtypit (dpa). Ai shtoi se kjo ishte arsyeja pse vendosi të dërgonte një ekip të rangut të lartë nga Policia Federale në Jerusalem.
Oficerët po mbështesin rindërtimin e policisë dhe forcave të sigurisë në territoret palestineze nga zyra e tyre në Jerusalem dhe janë të vendosur në Zyrën për Siguri (OSC), theksoi Dobrindt. Ekipi, fillimisht i përbërë nga katër oficerë policie, mbërriti në territoret palestineze rreth dy javë më parë, sipas agjencisë së lajmeve.
Misioni i ekipit synon të zhvillojë më tej kontributin gjerman në forcimin e forcave civile të sigurisë në territoret palestineze, duke u bazuar në mbështetjen më se 15-vjeçare të policisë gjermane që është tashmë në fuqi.
Sipas dpa, misioni i BE-së EUBAM Rafah është aktiv sërish që nga fillimi i vitit 2025. Detyra e tij kryesore është ruajtja e një praniejeje neutrale në pikën kufitare Rafah midis Rripit të Gazës dhe Egjiptit, megjithatë, aktualisht është në gjendje gatishmërie.
Ministria e Brendshme bëri të ditur se Gjermania aktualisht po merr pjesë në këtë mision me dy oficerë policie, të cilët janë të stacionuar në Ramat Gan, Izrael. Detyrat koordinuese dhe administrative kryhen nga Ramat Gan.
Pjesëmarrja gjermane në misionin EUPOL COPPS, mandati i të cilit është zhvillimi i mëtejshëm i policisë palestineze dhe i zbatimit të ligjit në Bregun Perëndimor, pritet të rifillojë në janar të vitit të ardhshëm. Një oficer policie gjermane ishte i vendosur atje për herë të fundit deri në fund të tetorit.
Ndërkohë, Forcat e Armatosura Gjermane kanë aktualisht tre oficerë shtabi në Izraelin jugor, si pjesë e procesit të stabilizimit në Rripin e Gazës. Sipas Ministrisë së Mbrojtjes, ushtarët janë të vendosur në uniformë, por të paarmatosur në Qendrën e Koordinimit Civilo-Ushtarak (CMCC), të udhëhequr nga SHBA-të.