Gjermania: SHBA-ja e përkushtuar ndaj NATO-s, pavarësisht qëndrimit kritik ndaj BE-së
Gjermania deklaroi sot se është e bindur se Shtetet e Bashkuara të Amerikës mbeten të përkushtuara ndaj NATO-s, edhe përkundër qëndrimit kritik të tyre ndaj Bashkimit Evropian.
“Strategjia kombëtare e sigurisë përmban deklarata shumë të qarta në lidhje me sigurinë e Shteteve të Bashkuara, të cilat lidhen me NATO-n dhe dëshmojnë një përkushtim ndaj saj,” tha ministri i Jashtëm gjerman, Johann Wadephul.
“Ka disa formulime në këtë dokument që ngrenë pyetje; kjo është e qartë. Megjithatë, bërthama e Aleancës, parimi i bashkëpunimit dhe Neni 5, janë plotësisht të paprekshëm në Uashington dhe Berlin,” shtoi Wadephul, duke reaguar ndaj dokumentit amerikan, i cili ka shtuar shqetësimet në Evropë për unitetin transatlantik.
I pyetur nëse Evropa mund të mbetet e vetme në mbështetjen dhe mbrojtjen e Ukrainës, Wadephul u përgjigj: “Shtetet e Bashkuara janë shumë qartë të përkushtuara ndaj NATO-s.”
Ai nënvizoi se mbrojtja bërthamore e Aleancës mbron Evropën dhe i mundëson asaj të jetë politikisht funksionale çdo ditë. “Këshilloj që të mos vëmë në dyshim gjëra që vetë SHBA-ja nuk i ka vënë në dyshim,” tha ai.
Dokumenti i ri i strategjisë kombëtare të sigurisë së SHBA-së, i publikuar javën e kaluar, përshkruan prioritetet e administratës Trump në politikën e jashtme dhe të sigurisë. Ai thekson rajonin e Indo-Paqësorit, ndërsa refuzon karakterizimin e Rusisë nga qeveritë evropiane si “kërcënim ekzistencial”.