Gjermania Aspron Ligjin për Azilin, Ndërkohë që Aplikimet Përgjysmohen
Numri i kërkesave fillestare për azil në Gjermani ka shënuar një rënie prej 51% që nga fillimi i vitit 2025, falë masave të qeverisë Merz. Ky vit ka regjistruar 106.298 kërkesa fillestare, krahasuar me 216.861 të paraqitura në vitin 2024. Zyra Federale për Migrimin dhe Refugjatët (BAMF) ka konfirmuar këtë ulje, ndërkohë që komentatorët nga gazetat konservatore gjermane, si Frankfurter Allgemeine Zeitung, theksojnë se “kthesa në politikën e azilit u krye”, duke lehtësuar sistemin gjerman të migrimit dhe konfirmuar efektivitetin e masave të qeverisë së re.
**Bashkëveprimi i Masave për të Arritur Suksesin**
Suksesi i arritur deri më tani buron nga bashkëveprimi i disa masave. Që nga marrja e detyrës shtatë muaj më parë, qeveria Merz ka dërguar sinjale të qarta në disa fronte: duke forcuar kontrollet kufitare, duke zbatuar sprapsime në kufi dhe duke mbajtur një qëndrim të ashpër ndaj migracionit ilegal në diskursin publik.
Koalicioni qeveritar aktual ka zbatuar masa më të rrepta për mbrojtjen e kufirit. Ministri i Brendshëm Alexander Dobrindt ka dërguar forca shtesë të policisë federale në kufi dhe ka insistuar në praninë e tyre të vazhdueshme, pavarësisht kritikave. Shumica e azilkërkuesve ilegalë vijnë nga kufiri tokësor, duke hyrë nga shtete të sigurta fqinje me Gjermaninë. Fakti që ata përpiqeshin të hynin në Gjermani duke ardhur nga shtete të sigurta, duke aplikuar kështu ilegalisht për azil, ka bërë që policia t’i sprapste ata lehtësisht.
**100.000 Kërkesa për Azil: Pak për Gjermaninë, Shumë për të Tjerët**
Në Gjermani, 100.000 kërkesa për azil konsiderohen tani një shifër e ulët. Megjithatë, shifrat e aplikimeve për azil para vitit 2012 kanë qenë dukshëm më të ulëta. Aktualisht, lëvizjet migratore janë intensifikuar globalisht. Është e qartë se të njëjtat shifra që Gjermania i konsideron të ulëta, janë alarmante për shtete të tjera evropiane, si për shembull Britania e Madhe.
Numri i azilkërkuesve që mbërritën këtë vit në Gjermani, mbi 100.000, ishte i ngjashëm me atë që shkoi në Britaninë e Madhe vitin e kaluar, duke shënuar për herë të parë një shifër kaq të lartë në historinë e vendit. Në vitin 2025, atje kanë mbërritur madje 110.000 persona. Kjo situatë ka detyruar edhe qeverinë aktuale britanike, një qeveri laburiste, nën presionin e rritjes së partisë Reformiste UK të Nigel Farage, të angazhohet për një ashpërsim të ndjeshëm të sistemit të azilit.
**Hapa Drejt Kufizimit të Migrimit**
Gjermania do të vazhdojë të ofrojë mbrojtje për azilkërkuesit në rrezik, por vitet e fundit ka pasur një shpërdorim të lartë të sistemit. Megjithëse Gjermania ka nevojë për punëtorë të huaj, kryesisht të kualifikuar, ajo nuk kërkon migrim ilegal. Forcat konservatore tani dëshirojnë që koalicioni të vazhdojë të thellojë politikat, duke rishikuar ata që ndodhen ligjërisht në Gjermani dhe kërkojnë shtetësinë gjermane. Politikanë konservatorë argumentojnë se marrja e shtetësisë gjermane vetëm për shkak të viteve të qëndrimit ligjor, pa një lidhje të vërtetë me Gjermaninë, nuk kontribuon në forcimin e vendit. Kjo fushë, e favorizuar edhe nga partia ultra e djathtë AfD, mund të mos jetë e lehtë për t’u avancuar.
**Dhënia e Shtetësisë Gjermane Pritet të Vështirësohet**
Deri sa të krijohet një lidhje “e vërtetë” dhe e dëshirueshme e shtetasve të rinj me Gjermaninë, partitë konservatore (CDU/CSU) dhe socialdemokratët (SPD) synojnë të ashpërsojnë më tej ligjin e shtetësisë. Sipas informacioneve fillimisht nga Bild-Zeitung dhe më pas nga burime të tjera, ky ashpërsim përfshin një sanksion të fortë:
* Në të ardhmen, personat që falsifikojnë certifikatën e provimit të gjermanishtes dhe kapen, nuk do të kenë të drejtë të aplikojnë sërish për shtetësinë gjermane për 10 vjet.
* Edhe nëse aplikimi paraqitet sërish gjatë periudhës së bllokadës dhjetëvjeçare, nuk do të ketë dobi. Ata do të regjistrohen në një regjistër të posaçëm që do të përshpejtojë refuzimin e kërkesës, bazuar në ligjin e ndryshuar.
* Personi do të hyjë në një bllokadë dhjetëvjeçare deri në momentin që do të lejohet të riaplikojë, edhe nëse ka marrë shtetësinë në mënyrë joligjore dhe mashtrimi zbulohet pasi e ka marrë atë.
Ky ndryshim ligjor, i kërkuar në Komisionin e Brendshëm të Bundestagut nga partitë në pushtet, pritet të votohet këtë vit. Anulimi i natyralizimit të përshpejtuar pas tre vjetësh për persona të mirëintegruar, miratuar nga qeveria e kaluar, ka ndodhur që në tetor.
Gjithashtu, të premten (05.12.) ishte parashikuar votimi për heqjen e detyrimit të shtetit për të paguar avokatin në rast paraburgimi para dëbimit, një vendim i qeverisë së kaluar.
**Sfondi më i Gjerë i Aspërsimit të Ligjit të Shtetësisë**
Ligji forcohet si përgjigje ndaj mashtrimeve të vazhdueshme me certifikatat e gjuhës gjermane. Për të marrë shtetësinë gjermane, individët duhet të dëshmojnë aftësinë për të komunikuar në gjermanisht në jetën e përditshme, zakonisht me një certifikatë të nivelit B1. Së fundmi, në jug të Gjermanisë, u identifikuan pesëmbëdhjetë të pandehur kryesorë që organizonin falsifikimin e certifikatave të gjuhës gjermane kundrejt pagesë. Në landet federale Baden-Württemberg dhe Hessen u zhvilluan kontrolle masive policore për këtë çështje. Përafërsisht në të njëjtën kohë vitin e kaluar, një grup falsifikuesish u përball me Gjykatën e Landit në Bonn për të njëjtën vepër penale. Ata kishin fituar miliona duke shitur certifikata gjuhësore të falsifikuara me çmime deri në 3000 euro. Aspërsimi i ligjit të shtetësisë synon të ketë një efekt parandalues.
*Burimi: Auron Dodi, “Deutsche Welle”*