GJKKO lë në burg Juxhin Drazhin, pjesë e grupit të Troplinëve
Gjykata e Posaçme (GJKKO) ka vendosur të lërë në burg Juxhin Drazhin, i cili është anëtar i grupit kriminal të njohur si “Troplinët”. Ky vendim vjen pas ekstradimit të tij nga Spanja, ku u arrestua javën e kaluar.
Seanca gjyqësore u zhvillua me dyer të mbyllura. Prokurori Vladimir Mara kërkoi që Drazhit t’i ruhet masa shtrënguese e paraburgimit, e cila ishte dhënë më parë në mungesë. Kjo kërkesë u pranua nga gjykata.
Juxhin Drazhi akuzohet për vepra të rënda penale, përfshirë ‘Trafikim i narkotikëve’ në formën e grupit të strukturuar kriminal, ‘Grup i strukturuar kriminal’ dhe ‘Kryerja e veprave penale nga organizata kriminale ose grupi i strukturuar kriminal’.
Ai u ekstradua në Shqipëri rreth 3 muaj pas arrestimit të tij në Spanjë. 34-vjeçari dyshohet të ketë qenë pjesë e një grupi të strukturuar kriminal që merrej me trafikimin e lëndëve narkotike nga Norvegjia drejt Belgjikës.
Prokuroria e Posaçme ka bërë të mundur sekuestrimin e disa pasurive, të cilat mendohet se i përkasin Juxhin Drazhit dhe janë përfituar nëpërmjet veprimtarisë kriminale.
Ndërkohë, Elvis Doçi, i njohur gjithashtu me nofkën “Visi i Pojës”, është akuzuar nga SPAK si drejtuesi i organizatës kriminale “Troplinët”.
Juxhin Drazhi u arrestua nga Guardia Civile Spanjolle në një banesë luksoze në qytetin e Malagës, ku jetonte me mbështetjen e bashkëpunëtorëve të tij.
Në emër të tij rezulton të jetë i regjistruar në Durrës një biznes që merret me tregtimin dhe dhënien me qira të automjeteve. SPAK ka zbuluar dhe sekuestruar gjithashtu 10 pasuri në emër të shoqërisë “Majestic Konstruksion”.
Pronari aktual i shoqërisë “Majestic Konstruksion” është Nazmi Shahini. Sipas SPAK, kalimet e shpeshta të pronësisë së kësaj shoqërie dhe pasuritë e regjistruara në emër të saj ngrenë dyshime të forta se këto të fundit i përkasin familjarëve të Juxhin Drazhit.
Gjithashtu, Juxhin Drazhi është në lidhje shoqërore me Ramazan Rrajën, me të cilin dyshohet se ka ortakëri biznesi në hotelin “Majestik” në Durrës.
