Kthesë e papritur në gjyqin për vdekjen e Maradonës: Mbrojtja vë në dyshim provat mjekësore
Një zhvillim i papritur ka ndodhur në procesin gjyqësor që lidhet me vdekjen e legjendës së futbollit, Diego Maradona. Mbrojtja ka ngritur dyshime serioze rreth vërtetësisë dhe përkatësisë së disa dokumenteve mjekësore, të cilat janë paraqitur si prova në gjykatë.
Gjatë seancës së mbajtur të enjten, avokati Agustin Varela, mbrojtës i infermieres Nancy Forlini (njëra nga të pandehurat), ka pretenduar se rezultatet e analizave të veshkave, të paraqitura si dëshmi, nuk i përkasin Diego Maradonës, por babait të tij.
Sipas argumenteve të mbrojtjes, disa nga dokumentet e paraqitura datojnë që nga viti 2015. Ata theksojnë se rezultatet e tyre nuk mund të lidhen me gjendjen shëndetësore të futbollistit, pasi në atë periudhë Maradona kalonte shumicën e kohës në Dubai. Në vitin 2015, Maradona ishte kthyer në Argjentinë për të vizituar babanë e tij, Diego Salustiano Maradona, i cili ndërroi jetë në qershor të po atij viti.
Për shkak të pretendimeve të ngritura nga mbrojtja, gjykata ka vendosur të shtyjë seancën deri më 27 gusht. Ky vendim është marrë për t’iu dhënë mundësia palëve të verifikojnë kujt i përkasin dokumentet dhe analizat mjekësore të paraqitura në dosjen e çështjes.
Shtatë persona në gjyq për vdekjen e Maradonës
Aktualisht, në proces gjyqësor janë shtatë të pandehur, përfshirë mjekë dhe kujdestarë që kanë qenë pjesë të ekipit të kujdesit shëndetësor të Maradonës gjatë periudhës së fundit të jetës së tij. Të pandehurit akuzohen për neglizhencë kriminale.
Diego Maradona ndërroi jetë në nëntor 2020, në moshën 60-vjeçare, në banesën e tij. Vdekja e tij erdhi vetëm disa javë pas një ndërhyrjeje kirurgjikale për heqjen e një mpiksjeje gjaku në tru.
Prokuroria pretendon se ekipi mjekësor që kujdesej për të nuk i ka ofruar trajtimin dhe monitorimin e nevojshëm gjatë ditëve të fundit të jetës së tij. Nga ana tjetër, të pandehurit mohojnë akuzat dhe argumentojnë se Maradona vuante nga një gjendje e rëndë shëndetësore dhe disa sëmundje kronike, të cilat, sipas tyre, kanë kontribuar në vdekjen e tij.
Prokuroria këmbëngul se mënyra se si ishte organizuar kujdesi mjekësor në shtëpi nuk përputhej me gjendjen e rënduar shëndetësore të ish-kapitenit të Argjentinës.
Vërtetësia dhe përkatësia e disa prej dokumenteve mjekësore pritet të sqarohen në seancën e radhës, e cila është caktuar për datën 27 gusht.