SHBA godet financat e Hezbollahut: Sanksionohen 10 individë, Uashingtoni pretendon lidhje me Iranin
Shtetet e Bashkuara kanë vendosur sanksione të reja ndaj një rrjeti financiar, i cili akuzohet se transferon fonde për organizatën Hezbollah. Uashingtoni pretendon se ky rrjet ka lidhje të ngushta me Iranin dhe Gardën Revolucionare Islamike.
Sanksionet amerikane janë vënë ndaj 10 individëve, të cilët, sipas Departamentit të Thesarit të SHBA-së, janë pjesë e një rrjeti që përdor korrierë dhe transferta ndërkombëtare për t’i siguruar Hezbollahut akses në valutë të huaj dhe për të shmangur sistemin financiar të kontrolluar nga sanksionet.
Autoritetet amerikane deklarojnë se korrierët udhëtojnë me fluturime komerciale mes Libanit, Turqisë, Emirateve të Bashkuara Arabe dhe Iranit, duke transportuar shuma paraje që mund të arrijnë në qindra miliona dollarë. Uashingtoni argumenton se ky mekanizëm i mundëson Hezbollahut të lëvizë fonde jashtë kanaleve zyrtare financiare.
Këshilltari i lartë i presidentit amerikan për çështjet arabe dhe të Lindjes së Mesme, Mashad Boulos, theksoi se këto masa synojnë të pengojnë përdorimin e Hezbollahut nga Irani për të destabilizuar Lindjen e Mesme dhe për të minuar sovranitetin e Libanit.
SHBA: Hezbollahu vepron si agjent i Iranit
Në kuadër të masave të reja, Uashingtoni ka riformuluar edhe përcaktimin ligjor të Hezbollahut, duke e përshkruar organizatën si një agjent të Iranit që vepron nën drejtimin e Gardës Revolucionare Islamike, veçanërisht Forcës Quds.
Shtetet e Bashkuara e kanë klasifikuar Hezbollahun si organizatë terroriste që prej vitit 1997, ndërsa në vitin 2001 e përfshinë në kategorinë e grupeve terroriste globale të përcaktuara posaçërisht.
Sipas Departamentit të Thesarit, ndryshimi i përcaktimit ligjor ka për qëllim të theksojë lidhjet operative, financiare dhe logjistike mes Hezbollahut dhe strukturave iraniane.
Një zyrtar i Departamentit të Shtetit e përshkroi Hezbollahun si një “shtojcë” të Gardës Revolucionare Islamike, duke kundërshtuar pretendimin e organizatës se është një lëvizje e pavarur e rezistencës libaneze.
Administrata amerikane deklaron se masat e fundit janë pjesë e përpjekjeve për të goditur burimet financiare të Hezbollahut dhe për të ndërprerë kanalet që, sipas Uashingtonit, përdoren për financimin e aktivitetit të organizatës.