Alarm në Zvicër: Identifikohet pacient me Hantavirus, autoritetet në gatishmëri
Autoritetet zvicerane kanë konfirmuar një rast të infektimit me hantavirus te një pasagjer i anijes turistike MV Hondius, duke ngritur shqetësime për një përhapje të mundshme të infeksionit.
Sipas njoftimeve zyrtare, pasagjeri u paraqit për kontroll mjekësor në një spital në Cyrih, pasi ishte informuar për incidentin nga kompania që menaxhonte anijen. Aktualisht, ai po merr trajtim mjekësor dhe është nën monitorim.
Në përputhje me rregulloret ndërkombëtare shëndetësore, Organizata Botërore e Shëndetësisë (OBSH) ka nisur bashkëpunimin me vendet e përfshira për të gjurmuar kontaktet e mundshme dhe për të parandaluar përhapjen e mëtejshme të virusit.
Analizat laboratorike kanë konfirmuar se bëhet fjalë për hantavirus të tipit Ande, një variant më agresiv, i njohur për shkaktimin e rasteve të rënda të sëmundjes. Konfirmimi është bërë nga institucione të rëndësishme si Instituti Kombëtar i Sëmundjeve Infektive në Afrikën e Jugut dhe Spitalet Universitare të Gjenevës në Zvicër, me mbështetjen e laboratorëve ndërkombëtarë në Senegal dhe Argjentinë.
Deri më 6 maj janë raportuar gjithsej 8 raste të dyshuara, nga të cilat 3 janë konfirmuar me analizat laboratorike.
OBSH thekson se do të vijojë monitorimin e situatës dhe bashkëpunimin me autoritetet përkatëse, me qëllim të garantimit të informimit dhe sigurisë së pasagjerëve, ekuipazhit dhe kontakteve të mundshme, si dhe për të kufizuar çdo rrezik të përhapjes së mëtejshme të virusit.